AQSh Ukrainaga yangi harbiy yordam paketi sifatida 125 million dollar berishni rejalashtirmoqda. Bu haqda Pentagon vakili Jon Kirbi brifingda ma’lum qildi, deb yozmoqda “RBK”.
“Bugun AQSh mudofaa vazirligi Ukraina xavfsizligiga ko‘mak tashabbusi uchun yangi, 125 million dollarlik yordam paketi berilishni e’lon qiladi”, — dedi Pentagon vakili.
Yangi paket Ukrainaga “hududiy yaxlitlikni saqlashga, shuningdek, o‘z chegaralarini himoya qilishni ta’minlashga” yordam berish maqsadida ishlab chiqilgan. Ajratilgan mablag‘ “NATO bilan o‘zaro hamkorlikni” yaxshilashga ham sarflanadi.
Avvalroq Pentagon rahbari Lloyd Ostin Ukrainaning mudofaa vaziri Andrey Taran bilan telefon orqali muloqoti chog‘ida AQSh “Rossiya tajovuzidan yanada samarali himoyalanish” uchun Ukraina Qurolli Kuchlari qudratining mustahkamlanishidan manfaatdor ekanini aytgan edi. Bungacha u Ukrainani, “o‘zini himoya qilish uchun”, qurol-yarog‘ bilan ta’minlashni yoqlagan.
2020-yil iyul oyida AQSh Senatining Tashqi aloqalar qo‘mitasi a’zolari Ukrainaga har yili 300 million dollarlik harbiy yordam ajratilishini nazarda tutuvchi qonun loyihasini taqdim etgan edi. Bundan tashqari, AQSh Senati 2021-moliyaviy yil (2020-yil, 1-oktabrdan boshlangan) uchun mudofaa budjeti loyihasini ma’qullagan, u, shu jumladan, Ukrainaga 250 million dollar miqdorida harbiy yordam ajratilishini ko‘zda tutadi.
Avvalroq Rossiya va Suriya AQShni jangarilarga gumanitar yordam ko‘rsatishda ayblagani haqida xabar berilgandi. Unga ko‘ra, go‘yoki Qo‘shma Shtatlar BMTdan Rukban qochqinlar lageri aholisi uchun gumanitar yordam olib, uni Vashington nazorati ostidagi jangarilarga o‘tkazmoqda. Moskva va Damashq Vashingtonni “AQSh bosib olgan hudud va uning ichida joylashgan Rukban lagerida sodir bo‘layotgan barcha narsalar” uchun javobgar qildi. Javobgarlikda, xususan, Suriya hukumati nazoratiga qaytarilgunga qadar aholini suv, oziq-ovqat va eng zarur narsalar bilan ta’minlash nazarda tutilmoqda.
Izoh (0)