Aleksandr Lukashenkoning to‘ng‘ich o‘g‘li Viktor Lukashenko Belarus prezidentining milliy xavfsizlik bo‘yicha yordamchisi lavozimidan ozod etildi. Bu haqda Belarus davlat agentligi ma’lumotlariga tayanib, “Interfaks” xabar berdi.
Prezident Aleksandr Lukashenko ushbu farmonni o‘g‘li Viktorning saylov yo‘li bilan tayinlanadigan lavozimga o‘tishi munosabati bilan imzoladi. 45 yoshli Viktor Lukashenko 2005-yildan beri Belarus prezidentining yordamchisi lavozimini egallab kelgan. 2021-yil 26-fevralda u otasining o‘rniga Belarus Milliy Olimpiya qo‘mitasi (MOQ) prezidenti etib saylandi. Bunga qadar 1997-yil may oyidan buyon Aleksandr Lukashenko MOQ prezidenti sifatida faoliyat yuritib kelayotgan edi. 26-fevral kuni MOQ bosh kotibi Polina Golovina qo‘mita rahbari lavozimiga ikkita nomzodni taklif qildi — Aleksandr va Viktor Lukashenko.
“Agar ikkita nomzod taklif qilingan bo‘lsa, bu men uchun yangilik. Bitta nomzod bilan chiqasiz deb o‘ylagandim. Men Olimpiya qo‘mitasi rahbari sifatida keyingi muddatga saylanishni rejalashtirmaganman. Agar o‘g‘limni o‘zingizga munosib ko‘rsangiz, uni sizga topshiraman. Va’da berib aytamanki, qo‘mitada o‘g‘rilik, korrupsiya, pulni noto‘g‘ri sarflash bo‘lmaydi. Shuningdek, sportchi va murabbiylarga eng yaxshi munosabat ko‘rsatiladi. Menga kelsak, men haliyam sport masalalaridan uzoqlashmayman”, — dedi Aleksandr Lukashenko qo‘mita saylovchilariga.
Shuningdek, 1-mart kuni Belarus prezidenti Aleksandr Lukashenko maxsus va harbiy unvonlar berish to‘g‘risidagi farmonlarni imzoladi. Xususan, Viktor Lukashenkoga zaxiradagi general-mayor unvoni berildi.
Belarusda general unvonlari, shuningdek, polkovnik unvoni faqat prezident farmoni bilan taqdim etiladi. Aleksandr Lukashenkoning o‘zi podpolkovnik va bosh qo‘mondon unvoniga ega.
2019-yil fevral oyida kursantlar bilan suhbat chog‘ida u o‘zini polkovnik unvoniga ko‘tarolmasligini aytgan. “Biror mukofotga loyiq ekanimni tushungan taqdirimda ham men o‘zimni taqdirlay olmayman. Ammo buning muammoli tarafi yo‘q. Men kimnidir mukofotlash to‘g‘risida farmon imzolaganimda juda mamnun bo‘laman”, — degan edi Lukashenko.
Belarus prezidenti o‘g‘li Viktordan tashqari navbatdagi general-mayor unvoni bilan polkovniklar Vladimir Kupriyanyuk, Roman Podlinev, Nikolay Karpenkov, Dmitriy Shaxraev, Andrey Pavlyuchenkoni taqdirlagan.
Avvalroq Lukashenko hokimiyatni o‘g‘illariga topshirishi haqidagi mish-mishlarni rad etgan edi.
“Ko‘p eshitsangiz kerak: hokimiyat tranziti, Lukashenko hokimiyatni hech bo‘lmaganda to‘ng‘ich o‘g‘liga topshiradi, u mamlakatda hukmronlik qiladi, degan gaplar yuradi. Mening oilamda bu hech qachon muhokama qilinmagan va muhokama qilinishi mumkin emasligini ham ko‘p aytganman. Chunki mendan keyin birorta farzandim Belarus prezidenti bo‘lmaydi”, — degan davlat rahbari Milliy olimpiya qo‘mitasi (MOQ) yig‘ilishida.
Izoh (0)