Turkmaniston davlat tovar-xomashyo birjasida prezident avtokarvonining zirhli mashinalari yana bir bor chet elda sotish uchun savdoga qo‘yildi. Bu haqda “Xronika Turkmenistana” xabar berdi.
Birjada jami oltita mashina sotiladi:
- 2001-yilda ishlab chiqarilgan ikkita zirhli Mercedes-Benz S600 — 48 500 dollarga;
- 2009-yilda ishlab chiqarilgan zirhli Bentley Continental —75 500 dollarga;
- 2010-yilda ishlab chiqarilgan zirhli Cadillac STS — 7200 dollarga;
- 2009-yilda ishlab chiqarilgan zirhli Lexus LS460 L AWD — 40 000 dollarga;
- 2006-yilda ishlab chiqarilgan zirhli Mercedes-Benz S600L — 65 500 dollarga.
Eslatib o‘tamiz, 2020-yil noyabr oyida xuddi shu lotlar shu narxda fond birjasiga qo‘yilgan. Shuningdek, mart oyida ham qo‘yilgan, ammo o‘shanda ular orasida 2006-yilda ishlab chiqarilgan Mercedes-Benz S600L bo‘lmagan.
Ma’lumot uchun, Turkmaniston prezidenti Gurbanguli Berdimuhamedov nafaqat nasldor otlarni, balki qimmat avtomobillarni ham yuksak qadrlashi haqida xabar berilgan. Berdimuhamedovni Mercedes va Maybach’dan tashqari Bugatti Veyron’ni boshqarib ketayotganida ham ko‘rishgan. 2010-yilda Top Gear jurnali Veyron’ga “O‘n yillikning eng yaxshi avtomobili” mukofotini topshirgan. Aynan o‘sha yilda mashina seriyali ishlab chiqariladigan dunyodagi eng tezkor avtomobil deya e’tirof etilgan.
Avvalroq Turkmaniston prezidenti 25-may — Ashxobod shahrining yubileyi kunida tug‘ilgan birinchi o‘g‘il bolaga Paytagt (Poytaxt) yoki Ashxobod ismini, qiz bolaga esa Merjen (Marjon) yoki May ismini qo‘yishni buyurgani haqida xabar berilgandi. Shuningdek, Berdimuhamedov mustaqillikning 30 yilligi va Ashxobodning 140 yilligini nishonlashning yuqori tashkiliy saviyasini ta’minlash uchun barcha choralarni ko‘rishni qat’iy talab qilgan va yaqinlashib kelayotgan tantanalar respublikaning ta’sirchan yutuqlari hamda muvaffaqiyatlarini aks ettirishi kerakligini ta’kidlagan.
Izoh (0)