JSST: Dunyoda COVID-19 pandemiyasining ikkinchi to‘lqini tugagani yo‘q

Koronavirus pandemiyasining ikkinchi to‘lqini hali tugamagan. Bu haqda Jahon sog‘liqni saqlash tashkilotining (JSST) Rossiyadagi vakili Melita Vuynovich aytib o‘tdi, deb yozmoqda “RBK”.

“Ikkinchi to‘lqin tugagani yo‘q. Garchi to‘lqinning pasayish ko‘rsatkichi yaxshi bo‘lsa-da, ayrim mamlakatlarda uning qayta ko‘tarilayotganiga guvoh bo‘lyapmiz, hatto birinchi to‘lqinning epidemiologik darajalariga hali erishilmagan”, — dedi Vuynovich.

JSST vakilining so‘zlariga ko‘ra, ko‘plab mamlakatlar aholisi hali ham “yetarli immunitetga” ega emas. Vuynovich, shuningdek, JSST pandemiya bilan bog‘liq ehtiyotkorlik va xavfsizlik choralarini ko‘rishga chaqirishda davom etayotganini qo‘shimcha qildi.

JSST bosh direktori Tedros Gebreyesusning aytishicha, 1-mart kuni tashkilot yetti hafta ichida birinchi marta COVID-19’ga chalinish holati ortganini qayd etgan. JSST ma’lumotlariga ko‘ra, kasallanish holatlarining ko‘payishi Shimoliy va Janubiy Amerika, Yevropa va Janubi-Sharqiy Osiyoda kuzatilgan. O‘tgan bir haftaning o‘zida tashkilot infeksiya yuqtirish bo‘yicha 2,6 milliondan ortiq holatni qayd etgan.

Jons Hopkins universitetining ma’lumotlariga ko‘ra, pandemiya boshidan beri butun dunyoda koronavirusga chalinganlar soni 114,4 million kishini tashkil etgan, 2,5 milliondan ortiq kishi kasallikdan vafot etgan.

Avvalroq Melita Vuynovich agar odamlar ehtiyot choralariga amal qilmasa, COVID-19 pandemiyasining uchinchi to‘lqini yuz berishi mumkin, deya ogohlantirgan edi. “Jamoaviy immunitet hali yetarlicha shakllanmagan, infeksiya tarqalishiga hech qanday to‘siq yo‘q. Ehtiyot bo‘lmasak, uchinchi to‘lqin boshlanishi mumkin. Bu odamlarning xatti-harakatlariga bog‘liq”, — deya izohlagan Melita Vuynovich.

Yanvar oyida JSST sog‘liqni saqlash bo‘yicha favqulodda vaziyatlar dasturi direktori Maykl Rayan koronavirusni to‘liq mag‘lub etish qiyin bo‘lishini aytgan. U COVID-19 endemik kasallikka aylanishini istisno qilmagan, uning fikricha, virusni butunlay yo‘q qilish deyarli imkonsiz.