O‘zbekistonga 1,7 kg giyohvandlik vositalarini oshqozonida olib o‘tmoqchi bo‘lgan shaxslar qo‘lga olindi

O‘zbekiston hududiga giyohvandlik vositalarini ichki a’zolariga yashirgancha olib kirishga bo‘lgan bir nechta urinish fosh qilindi. Bu haqda Davlat bojxona qo‘mitasi ma’lum qildi.

Tezkor tadbir davomida aniqlanishicha, Surxondaryo viloyati bojxona boshqarmasi “Ayritom” chegara-bojxona postiga piyoda ravishda kirib kelgan qo‘shni davlat fuqarosi T.S. inson tanasini skanerlovchi qurilma ko‘magida bojxona ko‘rigidan o‘tkazilganida uning ichki a’zolarida yumaloq shakldagi shubhali predmetlar borligi ma’lum bo‘lgan.

Shundan so‘ng shifokorlar ko‘magida ushbu shaxsning ichidan 44 dona polietilen o‘ram chiqarib olindi. Mazkur o‘ramlarga sof og‘irligi salkam 430 gr.ni tashkil qiluvchi “opiy” giyohvandlik vositasi yashirilgani aniqlangan.

Holatni mantiqan to‘la yakuniga yetkazish maqsadida Surxondaryo viloyati bojxona boshqarmasi Kontrabandaga qarshi kurashish va bojxona auditi bo‘limi xodimlari tomonidan Davlat xavfsizlik xizmati va Ichki ishlar idoralari vakillarini jalb qilgan holda ko‘p bosqichli tezkor tadbir rejasi ishlab chiqilgan.

Natijada giyohvandlik vositalarini ichki a’zolariga yashirgancha olib kirishga uringan boshqa shaxslar ham qo‘lga olingan.

Tezkor tadbir davomida ‘Ayritom’ chegara-bojxona postiga piyoda ravishda kirib kelgan qo‘shni mamlakat fuqarosi Q.K. ham tezkor kuzatuvga olindi va skaner qurilmasi ko‘magida ko‘zdan kechirildi. Natijada ushbu shaxsning ichida ham 34 dona skotchlangan o‘ram borligi fosh bo‘ldi.

Tibbiyot xodimlari ishtirokida chiqarib olingan mazkur o‘ramlar tekshirib ko‘rilganida esa ularning ichida salkam 650 gr. ‘gashish’ giyohvandlik vositasi borligi fosh bo‘ldi.

Oradan biroz o‘tib mazkur postga kirib kelgan fuqaro Q.N.ni ham o‘zidan oldingi sheriklarining qismati kutayotgan edi.

U ham ichki a’zolariga narkotik moddalarni yashirgani bir zumda bodi skaner qurilmasi ko‘magida fosh qilindi. Bu gal 31 dona o‘ram uchun ‘jonli konteyner’ vazifasini o‘tashga uringan shaxs 592,22 gr. ‘gashish’ giyohvandlik vositasini shu zaylda olib o‘tmoqchi bo‘lgan.

Shundan so‘ng tezkor tadbirlar Toshkent shahrida ham davom ettirilib, poytaxt mehmonxonlaridan birida mazkur narkotik moddalarni qabul qilib olishi kerak bo‘lgan shaxs ham qo‘lga olindi.

O‘tkazilgan tezkor tadbirlar natijasida jami 1672,22 gramm og‘irlikdagi giyohvandlik vositalarining noqonuniy aylanmasiga chek qo‘yildi, – deyiladi qo‘mita axborotida.