Namangan shahrining “Bunyodkor” mahallasida viloyat hokimi Shavkat Abdurazzoqovning vaqtinchalik uyi deyarli tayyor bo‘ldi. Bu haqda “Daryo” muxbiri Azizbek Abduvaliyev xabar bermoqda.
3 sotix maydonni egallagan uy mahalla profilaktika inspektorining xizmat uyi qarshisida joylashdi. Bu yerda 12 metrli konteyner va fuqarolar qabuli uchun mo‘ljallangan ixcham shiypon o‘rnatilgan.
Viloyat hokimligi sanoat va qurilish masalalari kotibiyati mudiri Jobir Abdullayevning ta’kidlashicha, uy yig‘ma beton devor bilan o‘ralgan, konteyner esa yengil konstruksiyali bo‘lib, istalgan payt boshqa hududga ko‘chirilishi mumkin.
Hozirda viloyat hokimi har kuni “Bunyodkor” mahallasida bo‘lib, xonadonma-xonadon yurib, aholi bilan muloqotda bo‘lmoqda. Shuningdek, bu yerga nafaqat mahalla ahli, balki boshqa hududlardan ham fuqarolar kelib, viloyat rahbariga bevosita murojaatlarini yetkazmoqda.
Eslatib o‘tamiz, Namangan viloyati hokimi Shavkat Abdurazzoqov 2021-yil 20-fevral kuni “Bunyodkor” mahallasi aholisi bilan uchrashuvida bugundan boshlab shu yerda yashashini ma’lum qilgandi.
«Har kuni shu yerda, sizlarga qo‘shni bo‘laman. Uyim mahalla idorasining ro‘parasida joylashadi. Bugun shu yerga konteyner o‘rnatiladi va unga ‘viloyat hokimining uyi’ deb yozib qo‘yiladi. Bu yerdagi holatni o‘nglab, keyin boshqa holati og‘ir hududga o‘tamiz», — degan edi o‘shanda Shavkat Abdurazzoqov.
Ma’lumot uchun, Prezident Shavkat Mirziyoyev 19-fevral kuni Namangan viloyatiga tashrifi chog‘ida “Bunyodkor” mahallasida bo‘lgan va ichimlik suvi yo‘q, ichki yo‘llar yomon, atrof obodonlashtirilmagan hududdagi ahvol uchun shahar hokimi va prokuroriga tanbeh bergandi.
Izoh (0)