“80 ming nafar xotin-qizning muammolari 3 oyda hal etildi” – Shavkat Mirziyoyev “ayollar daftari” haqida

Ayni paytda Prezident Shavkat Mirziyoyev raisligida o‘tkazilayotgan yig‘ilishda davlat rahbari xotin-qizlar muammolarini o‘rganish va manzilli ishlash maqsadida mutlaqo yangi tizim yaratilgani hamda “ayollar daftari” joriy etilganini ta’kidladi, deya xabar bermoqda “Daryo” muxbiri.

“Hududlarda bevosita 6,4 million nafar ayollar bilan muloqot qilish orqali 9 ta mezon asosida ‘ayollar daftari’ga 433 ming nafar ayollar kiritilib, elektron baza shakllantirildi. Shundan 253 ming nafari – ishsizlar, 44 ming – tibbiy, 48,5 ming – huquqiy va psixologik yordamga muhtojlar, 37 ming – boquvchisini yo‘qotgan, 33,5 ming – nogironligi bo‘lganlar (shundan 4,5 ming – uy-joyini ta’mirlashga muhtoj), 9 ming – noturar joyda yashovchilar, 8 ming – nogironligi bo‘lgan farzandini tarbiyalayotgan yolg‘iz ayollarni tashkil etadi.

Bugungi kunga qadar respublika komissiyasi tomonidan ‘ayollar daftari’ga kiritilgan 80 ming nafar xotin-qizlarning (19 foiz) muammolari 3 oyda hal etildi. Endi ishni ‘mahallabay’ tashkil etishda mahalla raisi, uning xotin-qizlar bo‘yicha o‘rinbosari boshchiligidagi Ayollar maslahat kengashlari xotin-qizlar muammolarini ‘xonadonbay’ aniqlab, sektor rahbarlari oldiga aniq va lo‘nda masalalarni qo‘yishi shart”, – dedi Prezident.

Davlat rahbari sektor rahbarlari, hokimlarning xotin-qizlar bo‘yicha maslahatchisi bilan birga, aniqlangan muammolarning yechimi bo‘yicha “Yo‘l xaritalari”ni ishlab chiqib, mahalliy kengashlarga kiritishi, ijrosi bo‘yicha har oyda xalq vakillariga hisobot berishini qayd etdi.