O‘zbekiston Prezidentining 24-fevraldagi qarori bilan mamlakatda suv resurslarini boshqarish va irrigatsiya sektorini rivojlantirishning 2021–2023-yillarga mo‘ljallangan strategiyasi tasdiqlandi, deb xabar beradi O‘zA.
Strategiya doirasida quyidagilar ta’minlanadi:
- irrigatsiya tizimi kanallarining beton qoplamali qismi 35 foizdan 38 foizgacha oshishi, irrigatsiya tizimi va sug‘orish tarmoqlarining foydali ish koeffitsiyenti 0,63 dan 0,66 gacha oshishi;
- suv ta’minoti darajasi past bo‘lgan sug‘oriladigan maydonlar 526 ming gektardan 424 ming gektargacha kamaytirilishi;
- Suv xo‘jaligi vazirligi tizimidagi nasos stansiyalaridagi 518 ta nasos agregati va 807 ta elektrodvigatel zamonaviy energiya tejamkorlariga almashtirilishi, ularning yillik elektr energiyasi iste’moli 7,6 milliard kVt/soatdan 7,15 milliard kVt/soatgacha kamaytirilishi;
- suvni tejaydigan sug‘orish texnologiyalarini joriy qilish 308 ming gektardan 1,1 million gektargacha, shu jumladan, tomchilatib sug‘orish texnologiyasi 121 ming gektardan 822 ming gektargacha yetkazilishi;
- sho‘rlangan maydonlar 1926 ming gektardan 1888 ming gektarga, shu jumladan, o‘rtacha va kuchli darajada sho‘rlangan yerlar 581 ming gektardan 532 ming gektargacha qisqartirilishi;
- yer osti suv sathi muammoli holatda (0-2 metr) bo‘lgan sug‘oriladigan yer maydonlari 988 ming gektardan 900 ming gektargacha kamaytirilishi;
- qishloq xo‘jaligida foydalanishdan chiqib ketgan jami 232 ming gektar sug‘oriladigan yer maydonlari qayta foydalanishga kiritilishi;
- daryo va soylarda 6 ta gidrologik post qurilishi va qayta tiklanishi, 6 ta gidrologik post raqamli texnologiyalar asosida avtomatlashtirilgan uskunalar bilan jihozlanishi;
- Smart Water (“Aqlli suv”) raqamli texnologiyasi asosida suvning hisobi yuritiladigan suv xo‘jaligi obyektlari soni 18 576 tagacha yetkazilishi;
- 60 ta yirik suv xo‘jaligi obyekti raqamli texnologiyalar asosida avtomatlashtirilgan boshqaruvga o‘tkazilishi;
- Suv xo‘jaligi vazirligi tizimidagi 1688 ta nasos stansiyasidagi 5231 ta nasos agregatining elektr energiyasi iste’moli va suv sarfi hisobining monitoringi onlayn rejimda olib borilishi;
- mavjud meliorativ kuzatuv quduqlarining 2100 tasida raqamli texnologiyalar orqali monitoring olib borilishi;
- suv xo‘jaligida davlat-xususiy sheriklik tamoyillari asosida jami 124 ta loyiha amalga oshirilishi, sug‘orish uchun suv yetkazib berish xarajatlarining 9 foizi suv iste’molchilari tomonidan qoplanishi ta’minlanadi.
Suv tanqisligi sharoitida ekinlarni ko‘llatib sug‘orish va suvni zovurga tashlab qo‘yishning har bir holati favqulodda holat sifatida baholanadi, suvdan maqsadli va tejamli foydalanish, suv iste’moli tartibiga qat’iy rioya etilishi ustidan tizimli nazorat o‘rnatiladi hamda suvdan foydalanish va suv iste’moli tartibini buzganlarga nisbatan keskin choralar ko‘riladi.
Sug‘oriladigan yerlarning meliorativ holatini kuzatishda axborot texnologiyalari, geografik-axborot tizimlari, masofadan turib zondlash texnologiyalari va uchuvchisiz uchish apparatlaridan keng foydalanish to‘g‘risida ko‘rsatma berildi.
Maktabgacha ta’lim muassasalari, maktablar va aholi o‘rtasida suvni muhofaza qilish, suv resurslaridan samarali va tejamli foydalanishni tashkil etish borasidagi huquqiy ongni va madaniyatni oshirish maqsadida ommaviy axborot vositalari orqali maktabgacha ta’lim tashkilotlari, umumiy o‘rta ta’lim maktablarida hamda aholi o‘rtasida keng targ‘ibot-tashviqot tadbirlari tashkil etiladi.
Suv xo‘jaligi vazirligi, Moliya vazirligi, “O‘zgidromet” markazi, Davlat geologiya va mineral resurslar qo‘mitasi, Qoraqalpog‘iston Respublikasi Vazirlar Kengashi hamda viloyatlar hokimliklari bilan birgalikda 2021-yil 1-aprelga qadar keyingi yillarda suv ta’minoti va suvdan foydalanishni tahlil qilgan holda 2021-yil yozgi sug‘orish mavsumida kutilayotgan suv tanqisligining salbiy ta’sirini yumshatish bo‘yicha aniq chora-tadbirlarni ishlab chiqib, tegishli qaror loyihasini Vazirlar Mahkamasiga kiritadi.
Amalga oshirilayotgan chora-tadbirlar natijadorligi yuzasidan O‘zbekiston Prezidentiga har chorak yakuni bo‘yicha axborot berib boriladi.
Izoh (0)