Bugungi kunda O‘zbekiston aholisining qariyb yarmini, ya’ni 17 millionga yaqinini xotin-qizlar tashkil etmoqda. Bu haqda ayni paytda Prezident Shavkat Mirziyoyev raisligida xotin-qizlarning muammolarini hal qilish va ularni qo‘llab-quvvatlash masalasiga bag‘ishlab o‘tkazilayotgan videoselektor yig‘ilishida ta’kidlandi, deya xabar bermoqda “Daryo” muxbiri.
Yig‘ilishda ta’kidlanishicha, o‘tgan ikki yilda 116 mingga yaqin ayollar o‘z tadbirkorlik faoliyatini to‘xtatgan.
“Bir narsani aniq tushunib olish lozim. Oiladagi qariyb hamma yumushlar, farzandga ta’lim-tarbiya berishdan boshlab uylarimizni sarishta qilishgacha bo‘lgan, barcha yumushlar ular zimmasida. Oila tashvishlaridan ortib, erkaklar bilan tengma-teng ishlayotgan, o‘zining tashabbuslarini, orzu-umidlarini ro‘yobga chiqarish uchun, tunu-kun mehnat qilayotgan va barchaga o‘rnak bo‘layotgan xotin-qizlarimiz joylarda juda ko‘plab topiladi.
Lekin, barcha ayollarga ham jamiyatda o‘rnini topishi uchun munosib sharoit, imkoniyat yaratib bera olyapmizmi? Ularning barcha muammolari hal bo‘lyaptimi? Afsuski, yo‘q”, – dedi Prezident.
Davlat rahbari shu kabi muammolarni yana-da chuqur o‘rganish va bartaraf etish bo‘yicha Respublika Xotin-qizlar jamoatchilik kengashi raisi Tanzila Norboyevaga topshiriq berdi.
“Norboyeva Kengash faoliyatini samarali yo‘lga qo‘yib, ‘ayollar daftari’ bilan manzilli ishlash, xotin-qizlarni ijtimoiy-siyosiy faolligini oshirish, tadbirkorligini qo‘llab-quvvatlash, ta’lim va kasbiy ko‘nikmalar olishlari, munosib ish topishlariga har tomonlama ko‘maklashish, salomatligini saqlash, uy-joy masalalarini hal etish borasida tizimli chora-tadbirlarni amalga oshirishi hamda mas’ul idoralar faoliyatini muvofiqlashtirib borishi zarur.
Norboyeva va Rafiqov (Kasaba uyushmalari federatsiyasi raisi) har bir viloyatda yurib, xotin-qizlar masalalari bilan tanishadi va bugungi vazifalar ijrosini bevosita tashkil qiladi. Shuningdek, Norboyeva viloyat hokimlari bilan birga, har oyda bir marta tuman hokimlari, sektor hamda mutasaddi idora rahbarlarining xotin-qizlar muammolarini hal etish yuzasidan ko‘rilayotgan choralar to‘g‘risidagi hisobotlarini xalq deputatlari Kengashlarida eshitishni yo‘lga qo‘yadi”, – dedi Shavkat Mirziyoyev.
Bundan avval Shavkat Mirziyoyev raisligida qishloq va suv xo‘jaligi sohasida amalga oshiriladigan vazifalar yuzasidan videoselektor o‘tkazilgani, Shavkat Mirziyoyev Toshkent shahar hokimligiga tirbandliklar yuzaga kelayotgan ko‘chalarda qo‘shimcha harakat yo‘nalishlarini ochish bo‘yicha topshiriq bergani hamda Turkmaniston prezidenti Shavkat Mirziyoyevga maktub yo‘llagani haqida xabar berilgandi.
Izoh (0)