O‘zbekiston terma jamoasi a’zosi Aziz G‘aniyev qancha muddatga safdan chiqqani ma’lum bo‘ldi

Futbol bo‘yicha O‘zbekiston terma jamoasi va Toshkentning “Lokomotiv” klubi bosh shifokori Abror Pirriyev “Shabob Al-Ahli” yarim himoyachisi Aziz G‘aniyevning jarohati haqida ma’lumot berdi.

Abror Pirriyevning so‘zlariga ko‘ra, 22 yoshli o‘zbekistonlik futbolchida o‘ng oyoq tizza bo‘g‘ini old xochsimon boylamining uzilishi sodir bo‘lgan. Aziz 2021-yilning sentabr oyida maydonga qaytishi mumkin.

Hozirda “Shabob Al-Ahli” jamoasi rahbariyati G‘aniyevning jarrohlik amaliyotini o‘tkazish uchun Yevropaning kuchli sport tibbiyot markazlarini mo‘ljallagan. Ammo pandemiya sabab mavjud noqulayliklarni inobatga olgan holda o‘sha mutaxassislarni BAAga chaqirtirish varianti ham ko‘rib chiqilmoqda. Xudo xohlasa, barchasi rejadagidek amalga oshsa, kamida 6 oy muddatni oluvchi davo va reabilitatsiya muolajalaridan so‘ng Aziz sentabr oyida boshlanuvchi amirliklarning futbol mavsumiga tayyor bo‘lishi mumkin. MTJ a’zolari va muxlislar nomidan barchasi hamyurtimiz uchun xayrli yakun topishini Yaratgandan so‘rab qolamiz.

Abror Pirriyev, shifokor

2020-yilning fevral oyidan beri BAA klubida to‘p surayotgan G‘aniyev shu paytga qadar amirliklar chempionatida 15 ta o‘yin o‘tkazib, 1 ta gol va 4 ta golli uzatmani amalga oshirdi. Uning “Shabob Al-Ahli” bilan amaldagi shartnomasi 2022-yilda o‘z nihoyasiga yetadi.