Moskvaning “Spartak” klubi o‘zbekistonlik yarim himoyachi Oston O‘runovni futbol bo‘yicha Rossiya Premyer Ligasi qaydnomasidan chiqarib tashlandi. Bu haqidagi ma’lumot Premyer Liga saytining tegishli qismida paydo bo‘ldi.
2020-yilning yozida “qizil-oqlar” safiga qo‘shilgan 20 yoshli futbolchi jamoaning asosiy tarkibiga kira olmadi va Rossiya chempionatining 2020/21-yilgi mavsumida 8 ta o‘yin o‘tkazib, birorta ham gol urmadi.
“Spartak”ning jamoatchilik bilan aloqalar departamenti direktori Anton Fetisovning so‘zlariga ko‘ra Oston O‘runov sport prinsiplari, murabbiylar shtabi va klubning birgalikdagi qarori asosida qaydnomadan chiqarilgan.
Avvalroq O‘runovga “Rubin” va uning sobiq jamoasi “Ufa” tomonidan qiziqish bildirilayotgani haqida xabarlar tarqalgandi.
Qayd etilishicha, “Spartak” yaxshi taklif bo‘lgan taqdirda futbolchini sotishga tayyor.
Eslatib o‘tamiz, O‘runov 2020-yilning yanvarida “Ufa” futbolchisiga aylangandi va 2019/20-yilgi mavsumda Rossiya Premyer Ligasida 10 o‘yinda maydonga tushib, 2 ta sariq kartochka oldi. Oston yozgi transfer oynasida “Ufa”dan 1 million yevro evaziga poytaxt klubiga o‘tdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)