Koronavirusga qarshi kurashish shtabi a’zosi Nurmat Otabekov 17-fevral kuni AOKAda o‘tkazilgan brifingda O‘zbekistonda COVID-19’ga qarshi emlash boshlangach, bir kunda bitta punktda 70 kishi vaksina olishini ma’lum qildi.
“Koronavirusga qarshi emlangan shaxslar patronaj tibbiyot xodimlari tomonidan, emlangandan so‘ng 30 daqiqa davomida, keyinchalik 3 kun davomida uyiga tashrif buyurish yo‘li bilan muntazam surishtirib boriladi, ularning sog‘lig‘i ko‘zdan kechirilib, 64/x hujjat bilan rasmiylashtiriladi” — deydi Otabekov.
Ta’kidlanishicha, markazdan va aholi yashash punktlaridan uzoqda joylashgan hududlar aholisini koronavirusga qarshi emlashni amalga oshirish maqsadida borish uchun qulay, yaqin bo‘lgan oilaviy shifokor punkti filiallarida ham vaqtinchalik emlash punktlari tashkil qilinadi. Harakatdagi brigada-vrach, vaksinator va dublyorlardan iborat guruhlar faoliyati tashkil etilib, ular zarur avtotransport vositalari bilan ta’minlanadi.
“O‘zbekistonda 13 turdagi yuqumli kasallikka qarshi emlash tadbirlari amalga oshirib kelinmoqda. Mustaqillikning dastlabki yillarida aholi faqat 6 ta kasallikka qarshi emlangan. Hozirda emlash taqvimi muntazam takomillashib, to‘ldirib borilmoqda.
Koronavirus vaksinasi yangi vaksina, biroq biz bu kabi vaksinalarni qo‘llash bo‘yicha yetarlicha tajribaga egamiz. Shunday bo‘lsa ham, Qoraqalpog‘iston Respublikasi, Toshkent shahri va viloyatlarda koronavirusga qarshi emlash kunlarini o‘tkazish bo‘yicha tayyorgarlik tadbirlarida amaliy-uslubiy yordam ko‘rsatish maqsadida mutaxassislar biriktirilgan.
Emlash tadbirlariga jalb etilgan tibbiyot xodimlari malakasini oshirish, ularga maslahat, amaliy-uslubiy yordam ko‘rsatish ishlari tizimli ravishda olib borilayapti, ‘sovuqlik zanjiri’ga rioya qilgan holda koronavirusga qarshi qo‘llaniladigan vaksinalarni qabul qilish, saqlash, tashish va ma’muriy hududlarga yetkazish choralari ko‘rilgan, joylarda malakali mutaxassislardan iborat shtablar tashkil etilgan, emlash punktlari, harakatdagi va mobil brigadalar, emlashdan so‘ng nojo‘ya reaksiyalar aniqlangan holatda shoshilinch yordam ko‘rsatadigan shifoxonalar shay holatga keltirilgan”, — deydi Nurmat Otabekov.
Avvalroq Nurmat Otabekov O‘zbekistonda dastlabki bosqichda 50 mingga yaqin kishi COVID-19’ga qarshi emlanishini ma’lum qilgandi. Moliya vaziri Timur Ishmetov esa 2021-yilda O‘zbekiston koronavirusga qarshi kurashish tadbirlari va vaksina sotib olish xarajatlari uchun 3 trillion so‘m ajratishini bildirgan.
Izoh (0)