O‘zbekistonda plastik karta orqali to‘lov amalga oshirilganida tovarlar narxini ko‘tarish qonun bilan taqiqlanadi. Bu haqda Oliy Majlis Qonunchilik palatasi matbuot xizmati xabar berdi.
Qayd etilishicha, Oliy Majlis Qonunchilik palatasining 15-fevral kuni bo‘lib o‘tgan navbatdagi majlisida deputatlar “‘Iste’molchilarning huquqlarini himoya qilish to‘g‘risida’gi qonunga o‘zgartish va qo‘shimchalar kiritish to‘g‘risida”gi qonun loyihasini birinchi o‘qishda ko‘rib chiqqan.
Qonun loyihasini konseptual asoslash maqsadida ma’ruza qilgan Monopoliyaga qarshi kurashish qo‘mitasi raisi Najmiddin Sharipovning ta’kidlashicha, mazkur hujjat bilan iste’molchi huquqlarining ustuvorligi, iste’molchiga tovar (ish, xizmat), savdo va xizmat ko‘rsatish qoidalari to‘g‘risidagi ma’lumotlar davlat tilida taqdim etilishi (kelishuvga ko‘ra, boshqa tillarda ham) belgilanmoqda.
Shu bilan birga, sotuvchiga bir turdagi tovarlar uchun haq to‘lash shakliga qarab har xil narx belgilash taqiqlanmoqda, iste’molchiga nuqsonli va talabga javob bermaydigan tovar sotilganligini aniqlash bilan bog‘liq xarajatlar sotuvchi tomonidan qoplanishi tartibi joriy etilmoqda.
Shuningdek, hujjat bilan quyidagi huquqbuzarliklarga moliyaviy sanksiya joriy etilmoqda:
- iste’molchiga maqbul sifatli yoki nuqsonli tovarni almashtirib berish va tovar nuqsonlarini bepul bartaraf etish tartibini buzish;
- iste’molchini qo‘shimcha xizmatlardan foydalanishga qistash;
- ko‘rsatilmagan xizmatlar uchun haq olish;
- shartnomaga iste’molchi huquqlarini cheklab qo‘yadigan va qonun hujjatlariga zid bo‘lgan talablarni kiritish;
- yaroqlilik muddati o‘tgan tovarlarni realizatsiya qilish;
- normativ hujjatlar talablariga javob bermaydigan tovar, qalbakilashtirilgan oziq-ovqat mahsulotini ishlab chiqarish, olib kirish va realizatsiya qilish.
Deputatlarining fikricha, qonun loyihasining qabul qilinishi iste’molchilar huquqlari buzilishining oldini olishga, sotuvchining iste’molchi oldidagi mas’uliyati va javobgarligini oshirishga xizmat qiladi.
Izoh (0)