Коронавирусга қарши курашиш штаби аъзоси Нурмат Отабеков 17 февраль куни АОКАда ўтказилган брифингда Ўзбекистонда COVID-19’га қарши эмлаш бошлангач, бир кунда битта пунктда 70 киши вакцина олишини маълум қилди.
«Коронавирусга қарши эмланган шахслар патронаж тиббиёт ходимлари томонидан, эмлангандан сўнг 30 дақиқа давомида, кейинчалик 3 кун давомида уйига ташриф буюриш йўли билан мунтазам суриштириб борилади, уларнинг соғлиғи кўздан кечирилиб, 64/х ҳужжат билан расмийлаштирилади» — дейди Отабеков.
Таъкидланишича, марказдан ва аҳоли яшаш пунктларидан узоқда жойлашган ҳудудлар аҳолисини коронавирусга қарши эмлашни амалга ошириш мақсадида бориш учун қулай, яқин бўлган оилавий шифокор пункти филиалларида ҳам вақтинчалик эмлаш пунктлари ташкил қилинади. Ҳаракатдаги бригада-врач, вакцинатор ва дублёрлардан иборат гуруҳлар фаолияти ташкил этилиб, улар зарур автотранспорт воситалари билан таъминланади.
«Ўзбекистонда 13 турдаги юқумли касалликка қарши эмлаш тадбирлари амалга ошириб келинмоқда. Мустақилликнинг дастлабки йилларида аҳоли фақат 6 та касалликка қарши эмланган. Ҳозирда эмлаш тақвими мунтазам такомиллашиб, тўлдириб борилмоқда.
Коронавирус вакцинаси янги вакцина, бироқ биз бу каби вакциналарни қўллаш бўйича етарлича тажрибага эгамиз. Шундай бўлса ҳам, Қорақалпоғистон Республикаси, Тошкент шаҳри ва вилоятларда коронавирусга қарши эмлаш кунларини ўтказиш бўйича тайёргарлик тадбирларида амалий-услубий ёрдам кўрсатиш мақсадида мутахассислар бириктирилган.
Эмлаш тадбирларига жалб этилган тиббиёт ходимлари малакасини ошириш, уларга маслаҳат, амалий-услубий ёрдам кўрсатиш ишлари тизимли равишда олиб борилаяпти, ‘совуқлик занжириъга риоя қилган ҳолда коронавирусга қарши қўлланиладиган вакциналарни қабул қилиш, сақлаш, ташиш ва маъмурий ҳудудларга етказиш чоралари кўрилган, жойларда малакали мутахассислардан иборат штаблар ташкил этилган, эмлаш пунктлари, ҳаракатдаги ва мобил бригадалар, эмлашдан сўнг ножўя реакциялар аниқланган ҳолатда шошилинч ёрдам кўрсатадиган шифохоналар шай ҳолатга келтирилган», — дейди Нурмат Отабеков.
Аввалроқ Нурмат Отабеков Ўзбекистонда дастлабки босқичда 50 мингга яқин киши COVID-19’га қарши эмланишини маълум қилганди. Молия вазири Тимур Ишметов эса 2021 йилда Ўзбекистон коронавирусга қарши курашиш тадбирлари ва вакцина сотиб олиш харажатлари учун 3 триллион сўм ажратишини билдирган.
Изоҳ (0)