Toshkentda “Istiqlol” majmuasi tashkil etilib, u yerda mustaqillikning mazmun-mohiyati va tarixiy ahamiyatini aks ettiradigan yodgorlik kompozitsiyasi barpo etiladi. Bu Prezidentning “O‘zbekiston davlat mustaqilligining o‘ttiz yillik bayramiga tayyorgarlik ko‘rish va uni yuqori saviyada o‘tkazish to‘g‘risida”gi qarorida belgilangan.
Qarorga ko‘ra, O‘zbekiston davlat mustaqilligining o‘ttiz yillik bayramiga tayyorgarlik ko‘rish va uni yuqori saviyada o‘tkazish bo‘yicha respublika komissiyasi tashkil qilinadi.
Shuningdek, Toshkent shahrida barpo etilayotgan yerusti metro halqa yo‘li “O‘zbekiston mustaqilligining o‘ttiz yilligi” deb nomlanadi.
Shu bilan birga, O‘zbekistonning yangi taraqqiyot davri va rivojlanish istiqbollari mavzusida xalqaro ilmiy-amaliy konferensiya tashkil etiladi. O‘tgan davrda erishilgan yutuqlarga bag‘ishlangan “Yangi O‘zbekiston” kitob-albomi va to‘plamlar nashr qilinadi.
Avvalroq Shavkat Mirziyoyev elektr energiyasi, tabiiy gaz va ko‘mir ta’minotida yo‘l qo‘yilayotgan noqonuniy xatti-harakatlar haqida gapirgani va gaz eksportini qisqartirib, aholi ehtiyojlarini qondirish bo‘yicha ko‘rsatma berganini ma’lum qilgani haqida xabar qilingandi.
Izoh (0)