Surxondaryoda o‘z jiyani nomiga auksionsiz yer maydoni ajratib, uni katta pulga sotmoqchi bo‘lgan tuman qurilish bo‘limi boshlig‘i DXX tomonidan qo‘lga olindi. Bu haqda “O‘zbekiston 24” telekanalida efirga uzatilgan lavhada so‘z boradi.
Ma’lum qilinishicha, Surxondaryo viloyati Jarqo‘rg‘on tumani qurilish bo‘limi boshlig‘i “Yoshlar — kelajagimiz” davlat dasturi doirasida “Qorayontoq” mahallasi hududidan 4,5 sotix yer maydonini o‘z jiyani nomiga “Yoshlar mehnat guzari” qurilishi uchun auksion savdolari o‘tkazmasdan ajratib bergan.
U mazkur yer maydoniga “Yoshlar mehnat guzari” qurmasdan, uni boshqa bir fuqaroga 180 million so‘mga sotishga kelishib, ushbu pullarni qarindoshlari orqali olayotgan vaqtida ashyoviy dalillar bilan ushlangan.
Hozirda mazkur shaxsga nisbatan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Avvalroq Farg‘onada 8 gektar yer olishda yordam berish evaziga 8 ming dollar olgan sobiq kadastr xodimi ushlangani, Sirdaryoda 12 sotix yerni rasmiylashtirib berish uchun 1200 dollar talab qilgan qurilish bo‘limi boshlig‘i va uning o‘rtada vositachilik qilgan sherigi qo‘lga olingani to‘g‘risida xabar berilgandi.
Izoh (0)