Toshkentdagi “SUM” ro‘parasida Istiqlol majmuasi quriladi

Toshkent shahar hokimligi O‘zbekiston mustaqilligining 30 yilligiga bag‘ishlangan “Istiqlol” majmuasi konsepsiyasi loyihasini yaratish uchun tanlov e’lon qildi.

Shahar ma’muriyatidan olingan ma’lumotlarga ko‘ra, majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (SUM) qarshisidagi hudud tanlangan.

“Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi.

Tanlov doirasida “O‘zbek davlatchiligining 3 ming yillik siyosiy, iqtisodiy, ilmiy, madaniy, ma’naviy tarixi hamda o‘tgan 30 yil, ayniqsa, Yangi O‘zbekistonni qurish bosqichini o‘zida qamrab olgan jarayonlarni gavdalantiruvchi” “Istiqlol” majmuasi konsepsiyasi loyihasini ishlab chiqish zarur.

Tanlovda ishtirok etish istagini bildirgan yuridik va jismoniy shaxslar (ijodkorlar) tomonidan quyidagi yo‘nalishlar bo‘yicha o‘z takliflarini ishlab chiqishlari talab etiladi:

• majmuaning bosh g‘oyasi;
• majmuaning tuzilmasi – bosh rejasi (maydondagi ko‘p yillik manzarali daraxtlarni saqlab qolish sharti bilan);
• majmuaning asosiy ramzi va timsollari;
• majmuada aks ettiriladigan tarixiy voqeliklar (o‘zbek davlatchiligining 3 ming yillik tarixi, siyosiy, iqtisodiy, ilmiy, madaniy sohalardagi yutuqlarini inobatga olgan holda);
• tarixan mamlakat rivoji va mustahkamlanishida o‘zining ulkan hissasini qo‘shgan buyuk ajdodlar, milliy qahramonlarni majmuada tasvirlab berish;
• moddiy madaniyat durdonalari, buyuk davlat va harbiy arboblar, atoqli ayollar, ilm-fan va madaniyat arboblari, milliy ozodlik kurashi yetakchilari hamda olamshumul tarixiy voqealar to‘g‘risida;
• majmuaning me’moriy yechimi — bezaklar, ramziy timsollari;
• dunyo davlatlarida bunyod etilgan mustaqillik yodgorliklaridan farq qilgan holda majmuaning o‘ziga xos xususiyatlari;
• majmuani bunyod etishda foydalanish taklif etiladigan qurilish materiallari (marmar, yog‘och, tosh va boshqalar);
• majmuaning mazmunida tarixiy manbalar, xususan, ilm-fan, san’at, arxitektura yodgorliklaridan foydalanish;
• majmuaning ma’naviy, ma’rifiy va tarbiyaviy ahamiyati.

Tanlov 7-mart kuni yakunlanib, g‘oliblar 10-martga qadar aniqlanadi.

Tanlov g‘oliblari quyidagicha taqdirlanadi:

• birinchi o‘rin – 300 million so‘m va hukumat nomidan rasmiy tabrik;
• ikkinchi o‘rin – 200 million so‘m va hukumat nomidan rasmiy minnatdorchilik xati;
• uchinchi o‘rin – 100 million so‘m.

“Gazeta.uz”ning ma’lum qilishicha, hokimlik Fanlar akademiyasining Tarix instituti veb-saytida tanlov to‘g‘risida batafsilroq ma’lumot bilan tanishishni taklif qilgan, ammo ayni sahifa mavjud emas.

Avvalroq Toshkentning Eski shahar hududida milliy savdo shaharchasi tashkil etilishi mumkinligi haqida xabar berilgandi.