Gulistonda jarima maydonchasidan mashinasini chiqarib berishini so‘rab, YHXB xodimiga pora taklif qilgan haydovchi qo‘lga olindi

Sirdaryo viloyati Guliston shahrida YHXB xodimiga pora sifatida 500 AQSh dollari taklif qilgan haydovchi ushlandi, deya xabar qilmoqda IIV.

Ma’lum qilinishicha, 2021-yil 27-yanvar kuni soat 15:00 da Sirdaryo viloyati IIB Jinoyat qidiruv bo‘limi hamda Guliston shahar prokuraturasi xodimlari bilan hamkorlikda Sirdaryo viloyati Guliston shahar 3-mavze hududida joylashgan jarima maydonchasida tezkor tadbir o‘tkazilgan.

Tadbir davomida, fuqaro A.F safdor Sh.A.ga Labo mashinasini jarima maydonchasidan chiqarib berish va rasmiylashtirilgan ma’muriy bayonnomani yo‘q qilish evaziga, xodim tomonidan bir necha marotaba ogohlantirishiga qaramasdan, jarima maydonchasining qorovul xonasida 500 AQSh dollari miqdoridagi pulni pora tariqasida bergan vaqtida tadbir ishtirokchilari tomonidan daliliy ashyo bilan ushlangan.

Mazkur holat yuzasidan Guliston shahar prokuraturasi tomonidan tergovga qadar tekshiruv harakatlari olib borilib, A.F.ga nisbatan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilib, dastlabki tergov harakatlari olib borilmoqda.

Bundan avval Andijonda musiqa maktabi direktori 500 dollar pora bilan ushlangani, Farg‘onada 8 gektar yer olishda yordam berish evaziga 8 ming dollar olgan sobiq kadastr xodimi ushlangani hamda Gulistonda 1,5 ming dollar evaziga Milliy gvardiya tizimiga ishga kiritib qo‘yishni va’da qilgan shaxs qo‘lga olingani haqida xabar berilgandi.