Тошкентнинг Шароф Рашидов, Ислом Каримов ва Афросиёб кўчалари оралиғида, Марказий универмаг («ЦУМ») қаршисидаги ҳудудда Ўзбекистон мустақиллигининг 30 йиллигига бағишлаб «Истиқлол» мажмуасини барпо этиш халқ орасида кенг муҳокамага ва норозиликларга сабаб бўлмоқда.
Бу масала юзасидан 13 февраль, шанба куни жамоатчилик вакиллари билан бўлиб ўтган учрашувда Тошкент шаҳар ҳокими Жаҳонгир Ортиқхўжаев «Истиқлол» мажмуаси мустақилликнинг рамзини акс эттирувчи стела барпо этилишини кўзда тутиши, бошқа ҳеч қандай қурилиш иншоотлари бўлмаслигини маълум қилди.
Шу ернинг маҳалла раиси стела қурилишини қўллаб-қувватлаб, «ЦУМ» қаршисидаги боғ ҳимояси учун 9 мингта овоз тўпланган бўлса, ушбу объект барпо этилиши учун 90 мингта овоз тўплаш мумкинлигини айтди.
«Айтишларича, (боғ ҳимояси учун — таҳр.) 9 мингта овоз тўпланибди. Аммо бугун-эрта ушбу монумент учун 90 мингта овоз тўпласак, ҳайрон қолманг. У Ўзбекистон мустақиллиги монументи. Тошкент — Ўзбекистон пойтахти. Тошкентда раҳбарият, архитекторлар бор, улар таклиф беришди», — деган у.
«Маҳалла раиси халққа демократия борлигини айта туриб, ўзи ҳам чалкашиб кетди. Унинг фикрича, демократия бу кўпчиликнинг озчиликка бўйсуниши. Аслида эса аксинча, агар кўпчилик қурилиш учун қарши бўлса, у тўхталиши керак», — деб ёзмоқда «Podrobno.uz».
Мулоқот давомида пойтахт раҳбари «Истиқлол» мажмуаси қуриладиган хиёбондаги кўп йиллик дарахтларнинг бир тупи ҳам кесилмаслигини, агар шундай ҳол кузатилса, ишдан кетишга ваъда берди. Жаҳонгир Ортиқхўжаев икки йил аввал хароба ҳолатдаги хиёбонни таъмирлаш учун ўз маблағидан 6 миллиард сўм сарфлаганини ҳам алоҳида таъкидлаб ўтган. Шунингдек, шаҳар ҳокимлигининг ҳаракатларига ишончсизлик билдираётганларга қарата, агар депутатлар уни ишдан кетишини истаса, лавозимини тарк этишга тайёрлигини маълум қилди.
Эслатиб ўтамиз, «Истиқлол» мажмуасини қуриш ва унда «мустақилликнинг моҳияти ва улкан тарихий аҳамиятини акс эттирувчи монументал композиция»ни яратиш Президентнинг 2020 йил 17 декабрдаги фармонида кўзда тутилган эди.
4 февраль куни Тошкент шаҳар ҳокимлиги Ўзбекистон мустақиллигининг 30 йиллигига бағишланган «Истиқлол» мажмуаси концепцияси лойиҳасини яратиш учун танлов эълон қилди. Мажмуани барпо этиш жойи сифатида Шароф Рашидов, Ислом Каримов ва Афросиёб кўчалари оралиғида, Марказий универмаг («ЦУМ») қаршисидаги ҳудуд танланган.
Ушбу таклиф жамоатчиликнинг кенг эътирозларига сабаб бўлди. Янгиликлар остидаги изоҳларда фойдаланувчилар пойтахтдаги кам сонли яшил ҳудудлардан бирига тегинмасликни, бу ерга шаҳарнинг турли бурчакларидан одамлар дам олиш учун келишини таъкидламоқда.
Ўзбекистон Президентининг қизи Саида Мирзиёева аҳолининг фикрини эътиборга олмасдан, боғ ҳудудларини тубдан ўзгартириш мумкин эмаслигини маълум қилди.
Шундан сўнг Тошкент шаҳри аҳолиси «ЦУМ» қаршисидаги боғни ҳимоя қилиш учун имзо йиғишни бошлади. 9 февраль куни боғ ҳимояси йўлида тўпланган имзоларнинг биринчи қисми Президент Халқ қабулхонасига топширилди.
Изоҳ (0)