Saida Mirziyoyeva yashil bog‘ hududlarini asrash zarurligini ta’kidladi

O‘zbekiston Prezidentining qizi Saida Mirziyoyeva o‘zining Telegram’dagi kanali orqali aholining fikrini e’tiborga olmasdan, bog‘ hududlarini tubdan o‘zgartirish mumkin emasligini ma’lum qildi.

“Shahar jamoat joylari, ayniqsa, yashil bog‘ hududlari muhofaza qilinishi, asralishi va kengaytirilishi lozim. Jamoat va shahar aholisining fikrini e’tiborga olmasdan ularni tubdan o‘zgartirish mumkin emas”, — deb yozadi u.

Post ostiga O‘zbekiston mustaqilligining 30 yilligi munosabati bilan “Istiqlol” kompleksini qurish rejalashtirayotgan Toshkent markazidagi “Moviy gumbazlar” skverining surati joylashtirilgan.

Saida Mirziyoyeva Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari hamda O‘zbekiston gender tengligini ta'minlash komissiyasi a’zosi hisoblanadi.

“Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi. Farmonda komleks quriladigan joy aniq ko‘rsatib o‘tilmagan.

11-yanvar kuni Shavkat Mirziyoyevga mamlakat banklari tomonidan 2021-yilda amalga oshirishni rejalashtirayotgan yirik investitsion loyihalar taqdim etilgandi. “Gazeta.uz”ning yozishicha, eskizlardan birida “SUM” qarshisidagi skverdagi kompleks loyihasi tasvirlangan.

4-fevral kuni Toshkent shahar hokimligi O‘zbekiston mustaqilligining 30 yilligiga bag‘ishlangan “Istiqlol” majmuasi konsepsiyasi loyihasini yaratish uchun tanlov e’lon qildi.

Taklif jamoatchilikning keng e’tirozlariga sabab bo‘lmoqda. Yangiliklar ostidagi izohlarda foydalanuvchilar poytaxtdagi kam sonli yashil hududlardan biriga teginmaslikni, bu yerga shaharning turli burchaklardan odamlar dam olish uchun kelishini ta’kidlamoqda. Skver yaqinda (2018-yilning bahorida) obodonlashtirilgan.

“Bayramni nishonlashni istaysizmi? Toshkent va O‘zbekistonning boshqa shaharlarida 30 ta bog‘ quring. Attraksionlarsiz, pafosli haykallar, fast-fud va ortiqcha ‘xarajat’larsiz, shunchaki soya-salqin bog‘lar — 30 ta — bu ramziy va xalq uchun. Ularning barchasi ‘Istiqlol’ deb nomlansa ham mayli, gap bunda emas — ular yashil, salqin va tinch bo‘lsin!”, — deb yozadi foydalanuvchilardan biri.

Toshkent hokimi Jahongir Ortiqxo‘jayev 2019-yilning mayida bergan intervyusida poytaxtning boshqa jamoat joylari qatori bog‘larni obodonlashtirish tufayli “odamlarni ko‘chaga qaytarish”ga muvaffaq bo‘lganini aytgandi. “Odamlar shuncha yil uyda o‘tirdi. Hukumat to‘rtta odam to‘planishidan qo‘rqib qolgandi. Men odamlardan qo‘rqish kerak emasligini isbotlashni xohladim. Ular turli odamlarni ko‘rishi, turistlar bilan muloqot qilishi, uydan chiqishi kerak”, — degan edi poytaxt hokimi.