Toshkent viloyati Ohangaron tumanidagi 48-sonli manzil-koloniyada diniy ma’ruza eshitgan F. ismli mahbusni kuch ishlatar xodimlar ayovsiz kaltaklagani e’lon qilingan, mazkur holat Ombudsman nazoratiga olinib, vaziyatga oydinlik kiritilgach, natijasi bo‘yicha OAVga batafsil ma’lumot taqdim etilishi ta’kidlangandi.
IIV Jazoni ijro etish bosh boshqarmasi matbuot xizmatining “Daryo”ga ma’lum qilishicha, mazkur xabar IIV Jazoni ijro etish bosh boshqarmasi tomonidan o‘rganilganida quyidagilar ma’lum bo‘ldi.
Mahkum F.M.ga manzil-koloniyada jazoni o‘tash shartlari, mahkumlarning huquq-majburiyatlari, muassasa ma’muriyatining qonuniy talablarini bajarish va internet tarmog‘iga ulanuvchi, video va ovoz yozishga mo‘ljallangan uyali aloqa vositasidan foydalanish mumkin emasligi tushuntirilgan. Biroq u ichki tartib-qoidalarga amal qilmasdan Samsung Note 5 markali telefondan foydalangan. Shundan so‘ng manzil-koloniya boshlig‘ining qarori asosida intizomiy jazoga tortilgan.
Uning foydalangan uyali aloqa vositasi xotirasida aniqlangan diniy materiallarni O‘zbekiston hududida taqiqlangan yoki taqiqlanmaganligiga aniqlik kiritish maqsadida sudga oid dinshunoslik ekpertizasi tayinlangan.
Mahkum F.M.dan uyali aloqa vositasi xodimlar tomonidan rasmiylashtirib olinishi hamda intizomiy bo‘linmaga kiritish jarayoni bilan bog‘iliq surishtiruv ishlari vaqtida unga koloniya xodimlari tomonidan hech qanday ruhiy va jismoniy tazyiq o‘tkazilmaganligi ma’lum qilingan. Shuningdek, birlamchi tibbiyot tekshiruvi natijasiga ko‘ra uning badanida biror-bir tan jarohati izlari aniqlanmagan.
Hozirda muassasa ma’muriyatiga nisbatan tuhmat qilish va yolg‘on xabarlarni tarqatish sabablari tekshirilmoqda.
Jazoni ijro etish muassasalarida mahkumlarning huquq va erkinliklarining muhofazasi doimiy ravishda prokuratura organlari hamda Oliy Majlisning Inson huquqlari bo‘yicha vakili (Ombudsman) tomonidan nazorat qilinadi.
Ijtimoiy tarmoqlarning faollari tomonidan tekshirilmagan axborotni jamoatchilikka tarqatish orqali biror-bir maqsadga erishishga harakat qilish jinoiy javobgarlikni keltirib chiqaradi.
IIV Jazoni ijro etish bosh boshqarmasi matbuot xizmatining ta’kidlashicha, Jazoni ijro etish tizimidagi muassasalarda jazo muddatini o‘tayotgan shaxslar sodir qilgan jinoyatidan qat’i nazar bir xil huquq va erkinliklarga ega bo‘lib, ulardan rejim talablariga rioya qilish birdek talab qilinadi.
Muassasalarda o‘rnatilgan tartib-qoidalarga rioya qilmay, tartibbuzarlik sodir qilgan mahkumlarga nisbatan Jinoyat-ijroiya kodeksining 105-moddasi talablari asosida intizomiy jazo choralari qo‘llaniladi.
Bundan avval marhum turkolog Andrey Kubatin qamoqda qattiq qiynoqlarga solingani, Andijonda fuqaroning qiynoqqa solinishi va kasalxonada vafot etishiga aloqador IIO xodimlariga sud hukmi o‘qilgani hamda O‘zbekistondagi qamoqxonalarda mahkumlarning qiynoqqa solinishi haqidagi videolavha yuzasidan bayonot berilgani haqida xabar berilgandi.
Izoh (0)