“Forsaj 9” filmining rejissori Jastin Lin suratga olish juda murakkab bo‘lgan epizodlardan biriga oid videorolik bilan bo‘lishdi. Toyota GT86 ishtirokidagi to‘rt soniyalik sahnani suratga olish uchun sakkiz oy kerak bo‘lgan, deb yozadi Motor.
E’lon qilingan videorolikda Vin Dizel qahramoni qizil Toyota GT86’da ko‘cha bo‘ylab harakatlanadi. Qaysidir onda Dominik Torettoning sportkari keskin yon tomonga shu qadar otilib ketadiki, avtomobil do‘kon peshtaxtalaridan o‘tib, harakatlanayotgan furgon kuzovi yonida paydo bo‘lib qoladi.
Toyota do‘konni “kesib” o‘tishi uchun muhandislar sportkarga maxsus platforma o‘rnatgan bo‘lib, u o‘z navbatida rels bo‘ylab harakatlangan. Ekstremal tryukning murakkabligi shundaki, mutaxassislar GT86’ning parvozini yuk mashinasi harakatiga shu qadar moslashtirishi kerak bo‘lganki, sportkar kuzovning belgilangan joyiga kelib urilishi kerak edi.
One 4 second shot in #F9. 8 months of prep. 4 days of production. 3 cars destroyed. Work from over a hundred of the most dedicated and talented crew. Best job in the world! pic.twitter.com/QK4wNYvAhE
— Justin Lin (@justinlin) February 7, 2021
Kartina rejissorining so‘zlariga ko‘ra, ekran vaqtida 4 soniya namoyish etiladigan sahnani suratga olish uchun 8 oyga yaqin vaqt va 100 kishidan iborat suratga olish guruhi kerak bo‘lgan. Suratga olish ishlarining o‘zi to‘rt kun davom etgan va buning natijasida uchta avtomobil yakson qilingan. Tryukni maksimal darajada mayda detallariga qadar ko‘rsatish maqsadida jamoa kinokameralar o‘rnatilgan robotlashtirilgan operator kranlaridan foydalangan.
“Forsaj” franshizasining to‘qqizinchi qismi 2021-yilning 27-mayida prokatga chiqishi kutilmoqda.
Avvalroq “Forsaj 5” filmidagi poyezdni o‘marish sahnasiga 25 million dollar sarflangani to‘g‘risida xabar berilgandi.
Izoh (0)