Amerikalik marhum aktyor Chedvik Bouzman har yili bo‘lib o‘tadigan Kinoaktyorlar gildiyasi mukofotiga 4 marta nomzod sifatida ko‘rsatilgan. Bunday natija mukofot tarixida faqatgina Jeyms Foks va Meggi Smitda kuzatilgan, deb yozadi Esquire.
Ma’lum qilinishicha, Bouzmanning Jorj S.Volfning “Ma Reyni: Blyuzning onasi” filmidagi roli eng yaxshi erkak ijrochi, Spayk Lining “Qondosh beshovlon” filmidagi ijrosi esa ikkinchi plandagi eng yaxshi aktyor sifatida nomzod qilib ko‘rsatilgan. Qolaversa, har ikki film ham kinodagi eng yaxshi aktyorlar jamoasi nominatsiyasidan o‘rin olgan. SAG Awards mukofotining 27-taqdirlash marosimi 2021-yilning 4-aprel kuni Los-Anjelesda bo‘lib o‘tadi.
“Qora Pantera” filmida u bilan birga suratga tushgan hamkasbi Maykl B. Jordan Instagram sahifasida do‘stini sog‘inayotganini yozib, Bouzman hali ham yuqori natijalarni qayd etayotganini qo‘shimcha qilgan. Avvalroq Chedvik drama janridagi filmda eng yaxshi erkak ijrochi sifatida “Oltin globus” mukofotiga ham nomzod bo‘lgan.
Eslatib o‘tamiz, Chedvik Bouzman 2020-yilning 28-avgust kuni saratondan vafot etgan. Bu haqda uning oila a’zolari ijtimoiy tarmoqlarda xabar bergandi.
Izoh (0)