Rossiyalik taniqli aktyor Leonid Kuravlyov aloqaga chiqmay qo‘ydi. Uning qayerda ekanligi ham noma’lum, deb xabar beradi “Komsomolskaya pravda”.
Nashrning yozishicha, artist 2012-yilda rafiqasi vafot etganidan so‘ng odamovi bo‘lib qolgan. Qo‘shnilarining so‘zlariga ko‘ra, u doim motam kiyimini kiyib yurgan va ko‘chaga juda kam chiqqan. 2020-yilning boshida Kuravlyov shahar tashqarisidagi uyiga ko‘chib o‘tgan.
Hozirda aktyor aloqaga chiqmay qo‘ygan va uning yaqinlari undan xavotirda.
Kuravlyovning do‘sti Aleksandr Shpaginning aytishicha, aktyor hamon marhum ayolini o‘ylab siqiladi. U hatto rafiqasining qabr toshiga o‘z ismini ham tushirgan.
Leonid Kuravlyov “Ivan Vasilyevish o‘z kasbini o‘zgartiradi”, “Afonya”, “Sibirlik sartarosh”, “Nozikoyim dehqon qizi” va boshqa ko‘plab filmlarda suratga tushgan.
Ta’kidlash kerakki, Leonid Kuravlyov “Mirotvorets” bazasiga (Ukraina milliy xavfsizligi, tinchlik, insoniyat xavfsizligi va xalqaro huquq-tartibotga qarshi jinoyatlar belgilarini tadqiq qilish markazi) kiritilgan. 2014-yilda u Rossiya madaniyat arboblarining prezident Vladimir Putinni Qrimdagi siyosatini qo‘llab-quvvatlash borasidagi murojaatiga imzo chekkandi.
Izoh (0)