Disney “Muzlik davri” hamda “Rio” multfilmlarini yaratgan Blue Sky Studios’ning yopilishini ma’lum qildi

Amerikaning The Walt Disney Company korporatsiyasi “Muzlik davri” va “Rio” multfilmlarini ishlab chiqargan Blue Sky Studios’ning yopilishini e’lon qildi, deb yozadi Esquire.

“Iqtisodiy vaziyatni inobatga olgan holda Blue Sky Studios’da ishlab chiqarishni tugatish to‘g‘risida qaror qabul qildik”, − deyiladi kompaniya bayonotida. Agentlik ma’lumotlariga ko‘ra, 2020-yil Disney 2,86 milliard dollar yo‘qotgan.

Oldindagi ikki oy davomida studiya butunlay yopiladi, natijada taxminan 450 kishi ishsiz qolishi mumkin. Xabarlarga ko‘ra, Blue Sky Studios xodimlariga boshqa Disney loyihalarida, shu jumladan, Walt Disney Animation Studios va Pixar’da ishlash taklif etilishi mumkin.

Blue Sky Studios 1987-yilda tashkil etilgan. 2017-yilning dekabrida Disney 21^st Century Fox studiyasini va kompaniyaning boshqa aktivlarini sotib olgan. Shuningdek, Blue Sky 13 ta to‘liq metrajli multfilm, shu jumladan, “Muzlik davri” franshizasining besh qismini chiqargan. 2019-yil hisobidan studiyaning so‘nggi ishi − “Shafqatsiz va mehribon ayg‘oqchilar” taqdimoti bo‘lib qolmoqda.