Toshkentdagi “SUM” qarshisidagi bog‘ himoyasi yo‘lida to‘plangan imzolarning birinchi qismi Prezident Xalq qabulxonasiga topshirildi, deb xabar bermoqda “Podrobno.uz” .
Hisob-kitoblarga ko‘ra, bog‘ himoyasi uchun poytaxt aholisining 5 mingdan ortig‘i fikr bildirgan. Bundan tashqari, bog‘ hududida “Istiqlol” majmuasi qurilishni bekor qilish to‘g‘risidagi onlayn petitsiyani 6,2 mingdan ortiq kishi imzolagan.
Xabarda aytilishicha, poytaxt aholisi jamoatchilik ovozi mamlakatda hali ham ahamiyatga ega ekanligiga, hokimlik “Istiqlol” majmuasi joylashtiriladigan hududni qayta ko‘rib chiqishiga umid qilmoqda.
Eslatib o‘tamiz, “Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi.
4-fevral kuni Toshkent shahar hokimligi O‘zbekiston mustaqilligining 30 yilligiga bag‘ishlangan “Istiqlol” majmuasi konsepsiyasi loyihasini yaratish uchun tanlov e’lon qildi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (SUM) qarshisidagi hudud tanlangan.
Ushbu taklif jamoatchilikning keng e’tirozlariga sabab bo‘ldi. Yangiliklar ostidagi izohlarda foydalanuvchilar poytaxtdagi kam sonli yashil hududlardan biriga teginmaslikni, bu yerga shaharning turli burchaklardan odamlar dam olish uchun kelishini ta’kidlamoqda.
O‘zbekiston Prezidentining qizi Saida Mirziyoyeva aholining fikrini e’tiborga olmasdan, bog‘ hududlarini tubdan o‘zgartirish mumkin emasligini ma’lum qildi.
Shundan so‘ng Toshkent shahri aholisi “SUM” qarshisidagi bog‘ni himoya qilish uchun imzo yig‘ishni boshladi. Bog‘ hududida har kuni volontyorlar ishlamoqda.
Poytaxt hokimligi Toshkent shahar Ekologiya va atrof-muhitni muhofaza qilish boshqarmasi tomonidan ‘Istiqlol’ majmuasi barpo etilishi belgilangan hududdagi ko‘p yillik manzarali daraxtlarni saqlab qolgan hamda hozirgi xiyobon faoliyatiga ta’sir qilmagan holda barpo etilishi, barcha daraxtlar xatlovdan o‘tkazilishi va muhofazaga olinishini bildirgan.
Eslatib o‘tamiz, ushbu bog‘ e’tiborsiz qolib, tozalik va sanitariya-gigiyena qoidalariga rioya qilinmayotgani haqidagi tandiqlardan so‘ng 2018-yil bahorida obodonlashtirilgan.
Izoh (0)