Bojxonachiga 9400 dollar taklif qilgan shaxs ushlandi

Qiymati 4 milliard so‘mdan ortiq bo‘lgan tovar-moddiy boyliklari kontrabandasi uchun bojxona xizmati xodimiga 9400 dollar miqdorida pora berishga uringan tadbirkor qo‘lga olindi, deya xabar bermoqda O‘zbekiston Davlat bojxona qo‘mitasi matbuot xizmati.

Xabar berishlaricha, ko‘p bosqichli tezkor tadbir Davlat bojxona qo‘mitasining Korrupsiyaga qarshi kurashish va O‘z xavfsizlik boshqarmasi, Toshkent shahar va Farg‘ona viloyati bojxona boshqarmalari tomonidan DXX xodimlari bilan hamkorlikda o‘tkazilgan.

Tadbirkor 2020-yilning dekabr oyida bojxona xodimlaridan birining telefon raqamlarini topib, unga uchrashib gaplashib olishni taklif qiladi. O‘zaro uchrashuvda u tez kunlarda xorijdan unga tegishli konteynerlar yetib kelishi, ularni inspeksion ko‘rik majmuasi orqali skanerdan o‘tkazmaslikni hamda “Xavfni boshqarish tizimi”da xavf guruhiga kiritmaslikni so‘ragan. Bojxona xodimi bu holat haqida o‘z rahbariyatini xabardor qilgan, shundan so‘ng jinoiy harakatlarni fosh qilishga qaratilgan reja-topshiriq ishlab chiqilgan.

Yanvar oyi boshida tadbirkor bojxona xodimiga pora tariqasida 9400 dollar pul va bir dona qimmatbaho qo‘l soati bergan. Tezkor tadbir shu bilan tugatilmagan, chunki konteynerlar hali O‘zbekistonga kirib kelmagan edi. 14—15-yanvar kunlari kutilgan uchta konteyner “Chuqursoy texnik idora” chegara-bojxona posti orqali kirib keladi.

Bojxona nazoratida konteynerdagi yuklar bilan ularga tegishli hujjatlar o‘rtasida tafovutlar aniqlanadi hamda chuqurlashtirilgan bojxona ko‘rigidan o‘tkazish belgilanadi. Yuklarni bojxonada rasmiylashtirish uchun yuk egalarining xohishiga binoan konteynerlar Farg‘ona viloyatidagi “Qo‘qon” tashqi iqtisodiy faoliyat bojxona postiga yo‘naltiriladi.

Ushbu postga yetgunga qadar konteynerlar bojxona plombalari bilan muhrlangan holatda bo‘ladi va ularni yo‘l davomida ochish mumkin emas. Biroq konteynerlar Dang‘ara tumanidagi qishloqlarning birida noma’lum shaxslar tomonidan plombalariga shikast yetkazilmagan holda ochilgan. Ular konteynerlardagi qimmat tovarlarni qiymati past boshqa mahsulotlarga almashtirayotganida tezkor xodimlar tomonidan ushlangan. Voqea joyida konteynerning temir asoslarini kesib ochishda foydalanilgan moslamalar, qirilgan va rangi ko‘chgan qismlarni bo‘yash uchun bo‘yoq va boshqa ashyoviy dalillar topilgan.

Voqea joyida tezkor xodimlar tomonidan qiymati 4,16 milliard so‘mlik 2200 dona bolalar, 800 dona kattalar, 327 dona turli o‘lchamdagi velosiped tovarlari, velosiped ehtiyot qismlari va boshqa tovarlar, shuningdek, pora tariqasida taqdim qilingan 9400 dollar va 1 dona qo‘l soati daliliy ashyo sifatida vaqtincha saqlovga olingan. Hozirda mazkur holat yuzasidan bojxona organlari tomonidan jinoyat ishi qo‘zg‘atilib, tergov harakatlari davom ettirilmoqda.