Ijtimoiy tarmoqlarda “Ayni damda Jizzax viloyati Paxtakor tumanida noma’lum shaxslar tomonidan ‘samosud’ qilinmoqda” nomli xabar tarqaldi. “Sirdaryo xabarlari” nashrining yozishicha, viloyat IIB holat yuzasidan ma’lumot bergan.
Ma’lum qilinishicha, holat yuzasidan olib borilgan surushtiruv ishlari davomida voqea Sirdaryo viloyati Sardoba tumanining Jizzax viloyati bilan chegaradosh hududida sodir bo‘lganligi aniqlangan.
Sirdaryo viloyati IIB mas’ul xodimlari tomonidan olib borilgan surishtiruv ishlari natijasida aniqlanishicha, fuqaro V.J. yaqin qarindoshlari D.I. va uning uch nafar farzandi bilan tomorqa yer maydoni talashib qolgan va ularning o‘rtasida janjal kelib chiqqan.
Mazkur holat yuzasidan hozirda Sardoba tuman IIB tomonidan tergovga qadar tekshiruv harakatlari olib borilmoqda.
Avvalroq Andijonda qoidabuzar haydovchilarni suratga olib, YPXga jo‘natgan fuqaroni “samosud” qilganlar jarimaga tortilgani, Angrenda ammasining qizini himoya qilgan yigit uch kishi tomonidan kaltaklangani, Surxondaryoda “samosud” uyushtirib, janjal sodir etgan guruhga nisbatan jinoiy ish ochilgani to‘g‘risida xabar berilgandi.
Izoh (0)