O‘zbekistondagi Carrefour savdo tarmog‘i boshqaradigan Majid al-Futtaim Hypermarkets Toshkentdagi yirik savdo maydonini taqsimlash bilan bog‘liq bahsli vaziyat sharoitida ta’sischilari va Akfa Group bilan munosabatlariga aniqlik kiritdi, deb xabar bermoqda “Gazeta.uz”.
Yanvar oyida Carrefour brendini boshqaradigan Dubayning Majid al-Futtaim kompaniyasi Samarqand Darvoza va Compass’ga egalik qilivchi UzOman fondi bilan ushbu savdo-ko‘ngilochar markazlarida Makro do‘konlari o‘rnda gipermarketlarni ochish to‘g‘risida shartnoma imzolaganini e’lon qildi. Makro supermarketlar tarmog‘i boshqaruvchisi Roman Sayfulin buni Makro va uning xaridorlari uchun kutilmagan “sovg‘a” bo‘lganini aytgandi.
2019-yilning oktabrida Majid al-Futtaim Akfa Group bilan Toshkentda 7 ta super va gipermarketlarni ochish to‘g‘risida shartnoma imzoladi. Ular Akfa egalik qiladigan obyektlarda joylashtiriladi.
O‘zbekistondagi Carrefour savdo tarmog‘i boshqaradigan Majid al-Futtaim Hypermarkets MChJ BAA Majid al-Futtaim kompaniyasining 100 foiz sho‘ba korxonasi. Bu haqda kompaniyaning 9-fevral kuni e’lon qilgan bayonotida ma’lum qilindi.
Majid al-Futtaim o‘z navbatida dunyoning 30 dan ortiq, shu jumladan, Yaqin Sharq, Afrika va MDH mamlakatlarida esksklyuziv huquqlarga ega Fransiyaning Carrefour chakana savdo kompaniyasining franchayzing sherigi.
Bugungi kunda kompaniya har kuni 750 mingdan ortiq mijozlarga xizmat ko‘rsatib, dunyoning 17 mamlakatidagi 320 ta do‘konni boshqaradi. O‘zbekiston hozirda uchta Carrefour supermarketi faoliyat yuritayotgan 17-davlatga aylandi.
“Akfa Group va O‘zbekistondagi boshqa chakana ko‘chmas mulk egalari bilan hamkorlikka kelsak, bu hamkorlik uzoq muddatli ijaraga asoslangan bo‘lib, unga muvofiq kompaniyamiz Carrefour do‘konlarini zamonaviy riteylerning yuqori standartlariga muvofiq ochish va operativ boshqarish uchun savdo binolarini ijaraga oladi”, — deyiladi kompaniya bayonotida.
Shuningdek, O‘zbekistonda Carrefour savdo tarmog‘ini kengaytirish bo‘yicha katta rejalarni hisobga olgan holda, Carrefour ijaraga beruvchi sheriklar ro‘yxatini kengaytirish ustida ish olib borayotgani va keyingi savdo do‘konlarini joylashtirish uchun turli istiqbolli maydonlar ko‘rib chiqilayotgani ta’kidlangan.
Bayonotda aytilishicha, kompaniyaning asosiy maqsadi — O‘zbekistondagi iste’molchilarga xalqaro standartlarga va Carrefour’ning eng yaxshi chakana tajribalariga muvofiq chakana xizmatlarni taqdim etish, ish o‘rinlarini yaratish va mahalliy ishlab chiqaruvchilarni qo‘llab-quvvatlash.
“Ta’kidlash joizki, turli mamlakatlarda faoliyat yuritib, biz doim mahalliy urf-odatlar va an’analarga chuqur hurmat bilan qaraymiz va o‘z faoliyatimizni hududdagi qonunchilikka qat’iy rioya qilgan holda olib boramiz”, — deb yakunlangan Majid al-Futtaim Hypermarkets bayonoti.
Kompaniya bayonoti Makro va Samarqand Darvoza kompaniyalari o‘rtasida ijara masalasidagi kelishmovchiliklar kuchaygan bir paytda e’lon qilindi. Carrefour savdo tarmog‘i Compass va Samarqand Darvoza’dagi Makro supermarketlari o‘rnida ochilishini Makro supermarketlar tarmog‘i boshqaruvchisi Roman Sayfulin “kutilmaganda sodir bo‘ldi” deya ta’riflagandi.
28-yanvar kuni Samarqand Darvoza savdo-ko‘ngilochar markazi xodimlari Makro supermarketlari tarmog‘ining savdo zali va omborxonadagi elektr energiyasi ta’minotini uzib qo‘ygani ma’lum bo‘ldi. Kompaniyadagilar Samarqand Darvoza’dagi Makro o‘z faoliyatini to‘xtatgani, tez buziladigan mahsulotlar olib chiqib ketilgani, 300 dan ortiq odam ishga chiqmay qo‘ygani, tarmoq chiqimlar qilayotgani, yuzlab mijozlar esa noqulaylik his qilayotganini ta’kidlagandi.
Shunga qaramay, Makro ijara shartnomasini uzaytirishga qaror qildi, ammo rad javobini oldi. Ziddiyatni o‘zaro kelishuv orqali hal qilib bo‘lmagani sababli Makro supermarketlar tarmog‘i Samarqand Darvoza’ni sudga berdi.
Izoh (0)