Toshkentning Sharof Rashidov, Islom Karimov va Afrosiyob ko‘chalari oralig‘ida, Markaziy univermag (“SUM”) qarshisidagi hududda “Istiqlol” majmuasining konsepsiya loyihasini ishlab chiqish muammosi xalq orasida keng muhokamaga va noroziliklarga sabab bo‘lmoqda. Ushbu holatga O‘zbekiston Ekologik partiyasi Markaziy kengashi matbuot xizmati munosabat bildirdi.
Qayd etilishicha, ushbu joyga muammoni o‘rganish maqsadida Ekologik partiya Markaziy kengashi Ijroiya qo‘mitasi raisi Narzullo Oblomurodov, rais o‘rinbosari Saidrasul Sanginov, murojaatlar bo‘limi boshlig‘i Ulug‘bek Pirmuhammedov, Oliy Majlis Qonunchilik palatasi hamda shahar kengashi deputatlari keldi. Bu yerda partiya faollari, jurnalistlar, blogerlar hamda fuqarolar o‘rtasida muloqot bo‘lib o‘tdi.
Muammo yuzasidan aholi, tadbirkorlar, savdo shoxobchalari fuqarolari fikrlari ham tinglandi, kerakli ma’lumotlar to‘plandi. Barcha ekologlar tomonidan shahar markazida joylashgan bu bog‘ni saqlab qolish, kerak bo‘lsa, yanada boyitish borasidagi fikrlari tinglandi.
“Bu majmuaning barpo etilishi ekologiya va atrof-muhitga ziyon yetkazmasligi va keng jamoatchilik fikrini inobatga olgan holda amalga oshirilishi zarur ekanligi ta’kidlandi. O‘zbekiston Ekologik partiyasi, Oliy Majlis Qonunchilik palatasi hamda shahar kengashi deputatlari tomonidan ushbu bog‘ni saqlab qolish borasida jamoatchilik eshituvini tashkil etish rejalashtirildi”, — deyiladi munosabatda.
“Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi.
4-fevral kuni Toshkent shahar hokimligi O‘zbekiston mustaqilligining 30 yilligiga bag‘ishlangan “Istiqlol” majmuasi konsepsiyasi loyihasini yaratish uchun tanlov e’lon qildi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (“SUM”) qarshisidagi hudud tanlangan.
Ushbu taklif jamoatchilikning keng e’tirozlariga sabab bo‘ldi. Yangiliklar ostidagi izohlarda foydalanuvchilar poytaxtdagi kam sonli yashil hududlardan biriga teginmaslikni, bu yerga shaharning turli burchaklardan odamlar dam olish uchun kelishini ta’kidlamoqda.
O‘zbekiston Prezidentining qizi Saida Mirziyoyeva aholining fikrini e’tiborga olmasdan, bog‘ hududlarini tubdan o‘zgartirish mumkin emasligini ma’lum qildi.
Shundan so‘ng Toshkent shahri aholisi “SUM” qarshisidagi bog‘ni himoya qilish uchun imzo yig‘ishni boshladi. 9-fevral kuni bog‘ himoyasi yo‘lida to‘plangan imzolarning birinchi qismi Prezident Xalq qabulxonasiga topshirildi.
Poytaxt hokimligi Toshkent shahar Ekologiya va atrof-muhitni muhofaza qilish boshqarmasi tomonidan “Istiqlol” majmuasi barpo etilishi belgilangan hududdagi ko‘p yillik manzarali daraxtlarni saqlab qolgan hamda hozirgi xiyobon faoliyatiga ta’sir qilmagan holda barpo etilishi, barcha daraxtlar xatlovdan o‘tkazilishi va muhofazaga olinishini bildirgan.
Eslatib o‘tamiz, ushbu bog‘ e’tiborsiz qolib, tozalik va sanitariya-gigiyena qoidalariga rioya qilinmayotgani haqidagi tandiqlardan so‘ng 2018-yil bahorida obodonlashtirilgan.
Izoh (0)