Тошкентнинг Шароф Рашидов, Ислом Каримов ва Афросиёб кўчалари оралиғида, Марказий универмаг («ЦУМ») қаршисидаги ҳудудда «Истиқлол» мажмуасининг концепция лойиҳасини ишлаб чиқиш муаммоси халқ орасида кенг муҳокамага ва норозиликларга сабаб бўлмоқда. Ушбу ҳолатга Ўзбекистон Экологик партияси Марказий кенгаши матбуот хизмати муносабат билдирди.
Қайд этилишича, ушбу жойга муаммони ўрганиш мақсадида Экологик партия Марказий кенгаши Ижроия қўмитаси раиси Нарзулло Обломуродов, раис ўринбосари Саидрасул Сангинов, мурожаатлар бўлими бошлиғи Улуғбек Пирмуҳаммедов, Олий Мажлис Қонунчилик палатаси ҳамда шаҳар кенгаши депутатлари келди. Бу ерда партия фаоллари, журналистлар, блогерлар ҳамда фуқаролар ўртасида мулоқот бўлиб ўтди.
Муаммо юзасидан аҳоли, тадбиркорлар, савдо шохобчалари фуқаролари фикрлари ҳам тингланди, керакли маълумотлар тўпланди. Барча экологлар томонидан шаҳар марказида жойлашган бу боғни сақлаб қолиш, керак бўлса, янада бойитиш борасидаги фикрлари тингланди.
«Бу мажмуанинг барпо этилиши экология ва атроф-муҳитга зиён етказмаслиги ва кенг жамоатчилик фикрини инобатга олган ҳолда амалга оширилиши зарур эканлиги таъкидланди. Ўзбекистон Экологик партияси, Олий Мажлис Қонунчилик палатаси ҳамда шаҳар кенгаши депутатлари томонидан ушбу боғни сақлаб қолиш борасида жамоатчилик эшитувини ташкил этиш режалаштирилди», — дейилади муносабатда.
«Истиқлол» мажмуасини қуриш ва унда «мустақилликнинг моҳияти ва улкан тарихий аҳамиятини акс эттирувчи монументал композиция»ни яратиш Президентнинг 2020 йил 17 декабрдаги фармонида кўзда тутилган эди.
4 февраль куни Тошкент шаҳар ҳокимлиги Ўзбекистон мустақиллигининг 30 йиллигига бағишланган «Истиқлол» мажмуаси концепцияси лойиҳасини яратиш учун танлов эълон қилди. Мажмуани барпо этиш жойи сифатида Шароф Рашидов, Ислом Каримов ва Афросиёб кўчалари оралиғида, Марказий универмаг («ЦУМ») қаршисидаги ҳудуд танланган.
Ушбу таклиф жамоатчиликнинг кенг эътирозларига сабаб бўлди. Янгиликлар остидаги изоҳларда фойдаланувчилар пойтахтдаги кам сонли яшил ҳудудлардан бирига тегинмасликни, бу ерга шаҳарнинг турли бурчаклардан одамлар дам олиш учун келишини таъкидламоқда.
Ўзбекистон Президентининг қизи Саида Мирзиёева аҳолининг фикрини эътиборга олмасдан, боғ ҳудудларини тубдан ўзгартириш мумкин эмаслигини маълум қилди.
Шундан сўнг Тошкент шаҳри аҳолиси «ЦУМ» қаршисидаги боғни ҳимоя қилиш учун имзо йиғишни бошлади. 9 февраль куни боғ ҳимояси йўлида тўпланган имзоларнинг биринчи қисми Президент Халқ қабулхонасига топширилди.
Пойтахт ҳокимлиги Тошкент шаҳар Экология ва атроф-муҳитни муҳофаза қилиш бошқармаси томонидан «Истиқлол» мажмуаси барпо этилиши белгиланган ҳудуддаги кўп йиллик манзарали дарахтларни сақлаб қолган ҳамда ҳозирги хиёбон фаолиятига таъсир қилмаган ҳолда барпо этилиши, барча дарахтлар хатловдан ўтказилиши ва муҳофазага олинишини билдирган.
Эслатиб ўтамиз, ушбу боғ эътиборсиз қолиб, тозалик ва санитария-гигиена қоидаларига риоя қилинмаётгани ҳақидаги тандиқлардан сўнг 2018 йил баҳорида ободонлаштирилган.
Изоҳ (0)