O‘zbekistonning Janubiy Koreyadagi elchisi Vitaliy Fen Hanshin Engineering & Construction Co., Ltd kompaniyasi raisi Choi Yon Son bilan uchrashdi, deb xabar berdi “Dunyo” agentligi.
Uchrashuv davomida Hanshin Engineering & Construction kompaniyasining O‘zbekistonda uchta investitsion loyihani amalga oshirish borasidagi rejasi muhokama qilingan. Rejadagi yirik loyihalar qatoridan Kokand City, loyiha instituti va golf kompleksi o‘rin olgan.
Kokand City
Hozirda Qo‘qon shahrida 34 gektar maydonda joylashgan ko‘p xonadonli Kokand City turar-joy majmualarini qurish masalasi ishlab chiqilmoqda. Noyabr oyida Hanshin Engineering & Construction kompaniyasining delegatsiyasi Farg‘ona viloyatiga tashrif buyurgan edi. U yerda ichki uy-joy bozoridagi vaziyat batafsil o‘rganilib, qurilish materiallari yetkazib beruvchilari, loyihalash institutlari bilan uchrashuvlar o‘tkazilgan, shuningdek, loyiha uchun ajratilgan maydon ko‘zdan kechirilgan.
Loyiha instituti
Shuningdek, kompaniya “Qishloqqurilishloyiha” MChJ, “Toshuyjoyliti” AJ va “O‘zog‘irsanoatloyiha” AJ negizida “MDH makonida noyob bo‘lib qoladigan” qo‘shma loyiha institutini yaratishni rejalashtirmoqda. Endi tomonlar ushbu uchta loyiha va tadqiqot institutlarining faoliyat ko‘lami, asosiy moliyaviy-iqtisodiy ko‘rsatkichlari to‘g‘risida fikr almashmoqda. Hanshin Engineering & Construction loyiha institutlarida davlat ulushini sotib olish imkoniyatini ko‘rib chiqadi.
Golf kompleksi
Janubiy Koreya kompaniyasi 800 million dollarga Samarqand viloyatida xalqaro toifadagi golf majmuasini barpo etishni rejalashtirmoqda. Loyihani 270 gektar maydonda amalga oshirish ko‘zda tutilgan, shundan golf maydoni va tashrif buyuruvchilar uchun turar joy binolari 194 gektarni, xalqaro maktab 6 gektarni, savdo-ko‘ngilochar va ko‘rgazma majmuasi 7 gektarni, zamonaviy ko‘p qavatli turar-joy majmuasi — 55 gektarni va unga qo‘shni boshqa infratuzilmalar egallamoqda.
Loyihaning konsepsiyasi 2019-yil noyabr oyida Samarqand viloyati hokimi Erkinjon Turdimov va Investitsiyalar va tashqi savdo vazirligiga taqdim etilgan. Hanshin Engineering & Construction qurilish ishlarini boshlash uchun javobni kutmoqda.
Uchala loyihani ham to‘g‘ridan to‘g‘ri investitsiyalar evaziga amalga oshirish rejalashtirilgan. 12—19-fevral kunlari kompaniya bosh ijrochi direktori boshchiligidagi delegatsiya O‘zbekiston bilan muzokaralarni davom ettirishi kutilmoqda.
2019-yil iyul oyida suzish havzalari, sun’iy orollar, restoranlar, mehmonxonalar va kongresslar markazini o‘z ichiga olgan Samarqanddagi eshkak eshish kanalida sayyohlik markazi qurilishi rejalashtirilgani haqida xabar berilgandi.
Izoh (0)