“Qarshi shahridagi mavjud ichki ko‘chalarni to‘liq ta’mirdan chiqarish uchun 79 mlrd so‘m kerak bo‘ladi”. Qashqadaryo hokimi Prezidentga hisobot berdi

Qashqadaryo viloyati markazi Qarshi shahridagi mavjud ichki yo‘llar ta’mirini tamomlash uchun 79 milliard so‘m kerak bo‘ladi. Bu haqda viloyat rahbari Prezident rahbarligidagi selektorda ma’lum qildi, deya xabar berdi “Daryo” manbasi.

Ma’lum bo‘lishicha, Shavkat Mirziyoyev raisligida bo‘lib o‘tgan selektor yig‘ilishda barcha viloyat hokimlarining hisoboti tinglangan.

Selektorda so‘z olgan Qashqadaryo hokimi Zoir Mirzayev shahardagi mavjud ichki yo‘llarning 35 foizi ta’mirdan chiqarilganini ma’lum qilib, qolgan ichki yo‘llar ham ta’mirdan chiqarilishi uchun yana 79 milliard so‘m zarur bo‘lishini ta’kidlagan.

“Viloyat budjetidan 25 milliard so‘m mablag‘ ajratib, 6 ta ko‘chani ta’mirlash ishlarini boshlab yubordik”, — dedi Zoir Mirzayev.

Qashqadaryo hokimining ma’lumot berishicha, Qarshi shahridagi mavjud 23 ta katta ko‘chaning atigi 5 tasida tungi yoritgichlar mavjud.

“Biz ko‘chalarni obod qilishda, ta’mirlashda o‘sha hududda yashovchi aholining harakatiga ham alohida e’tibor qaratyapmiz. Qaysidir ko‘chada yashovchi aholi uyini oqlab, hovlisi atrofini obodonlashtirishga kirishsa, biz ularga ko‘mak berib, aynan o‘sha ko‘chani obod qilishga harakat qilyapmiz”, — dedi viloyat hokimi Zoir Mirzayev.

Eslatib o‘tamiz, avvalroq davlat rahbari majlisbozlikka yo‘l qo‘yayotgan hokimlarni qattiq ogohlantirib, “Majlis qilmoqchimisan? Ishtirokchilar 15 kishidan oshiqmi, unda bosh vazirdan ruxsat olasan va keyin mahallaga borib, majlisni o‘sha yerda o‘tkazasan”, — degani haqida xabar berilgandi.