Bangladeshda 7-fevral kuni COVID-19’ga qarshi emlash kampaniyasi ish boshladi. Bu haqda mamlakat sog‘liqni saqlash vaziri Zohid Malik ma’lumotlariga tayanib, “Korrespondent.net” xabar berdi.
Aholi mamlakat bo‘ylab faoliyat ko‘rsatayotgan 1015 ta tibbiy markazda emlanadi.
Bungacha yanvar oyi oxirida Bangladeshda ikki kunlik tajriba immunizatsiyasi o‘tkazilgan. 28-yanvar kuni birinchi vaksinani hamshira qabul qilgan. Ikki kun davomida 529 kishi emlangan.
Bosh vazir Shayx Xasinaning ta’kidlashicha, birlamchi guruhda aholining 16,9 millioni emlangan. Mamlakat aholisi esa 161,4 millionni (2018-yil holatiga ko‘ra) tashkil qiladi.
Bangladesh hukumati aholini emlash uchun qanday vaksinadan foydalanilishi haqida ma’lumot bermagan.
Avvalroq Eron va Jazoirda 9-fevraldan “Sputnik V” vaksinasi bilan emlash boshlanishi va dunyoda koronavirusga qarshi emlanganlar soni 100 milliondan oshgani haqida xabar berilgan edi.
Izoh (0)