Yanvar oyida koronavirus paydo bo‘lishi va tarqalishining dastlabki bosqichlarini o‘rganish maqsadida Xitoyning Uxan shahriga kelgan Jahon sog‘liqni saqlash tashkiloti (JSST) mutaxassislari, virus tarqalishida mahalliy oziq-ovqat bozorining roliga oid “muhim dalillarni” topdi. Bu haqda JSST guruhiga kiruvchi zoolog Piter Dashak bergan ma’lumotga tayanib “Kommersant” xabar berdi.
Olim 10-fevralgacha, ular Uxan shahrini tark etgunga qadar, ushbu dallilar nashr etilishiga umid bildirdi. “Umid qilamizki, biz topgan dalillar sodir bo‘lgan voqealarni to‘liq anglab yetishning boshlanishi, bu keyingi pandemiyaning oldini olishga yordam beradi. Yuzaga kelgan vaziyatning mohiyatini tushunishga urinish — vaksinalarni kutish mobaynida doimiy ravishda global moliyaviy inqiroz va dahshatli o‘limlarni boshdan kechirmaslik uchun nihoyatda zarur”, — dedi Dashak.
Olim xitoylik hamkasblarining chet eldan kelgan guruh bilan hamkorlik qilishga qat’iy qaror qilganini ta’kidladi. “Biz har kuni ular bilan yig‘ildik va har bir yangi ma’lumotni sinchiklab o‘rganib chiqidik”, — dedi Dashak. U JSST olimlari mahalliy mutaxassislar bilan birgalikda chet ellik mutaxassislar o‘rganishni rejalashtirgan barcha muhim joylarga tashrif buyurganini qo‘shimcha qildi.
Jahon sog‘liqni saqlash tashkiloti delegatsiyasi 14-yanvar kuni Uxanga yetib kelgandi. AQSh, Avstraliya, Germaniya, Yaponiya, Buyuk Britaniya, Rossiya, Niderlandiya, Qatar va Vyetnam olimlari koronavirusning hayvonlardan kelib chiqish nazariyasini o‘rganmoqda.Avvalroq Uxanga tashrif buyurgan JSST ekspertlaridan biri Vladimir Dedkov koronavirusning Uxandagi laboratoriyadan sizib chiqqanini tasavvur qilish qiyinligi aytgandi. Dedkov, shuningdek, Uxan shahridagi dengiz mahsulotlari bozorida koronavirus infeksiyasining paydo bo‘lishi uchun barcha sharoitlar mavjudligini ta’kidlagan, chunki u sanitariya qoidalari nuqtayi nazaridan talablarga umuman javob bermaydi.
Izoh (0)