Amerikalik senatorlar guruhi AQSh Kongressiga muxolifatchi Aleksey Navalniy bilan bog‘liq vaziyat tufayli Rossiyaga qarshi sanksiyalar to‘g‘risidagi qonun loyihasini kiritdi. Tegishli bayonot respublikachi senator Mark Rubioning saytida e’lon qilindi, deb yozadi “RBK”. Tashabbusga uning bir qator hamkasblari hammualliflik qildi.
“Senatorlar xalqaro huquqning buzilishiga, shu jumladan, muxolifat yetakchisi va korrupsiyaga qarshi kurash bo‘yicha faol Aleksey Navalniyning zaharlanishiga va qamab qo‘yilishiga aloqador bo‘lgan rossiyalik mansabdorlarga qarshi maqsadli sanksiyalar joriy qilishni ko‘zda tutadigan qonun loyihasini qaytadan kiritdi”, — deyiladi xabarda.
Bunda gap senatorlar Rossiya hukumatiga qarshi kiritishni 2020-yil sentabrida taklif qilgan sanksiyalar loyihasi haqida bormoqda. Hujjatda cheklovlar ta’siriga tushishi mumkin bo‘lgan shaxslarning ismlari va lavozimlari keltirilmagan. Qonun loyihasida ehtimoliy sanksiyalar sifatida aktivlarning muzlatilishi va viza bermaslik tilga olingan.
Hujjat, shuningdek, AQSh ma’muriyatiga Rossiya hukumati kimyoviy va biologik quroldan foydalanishni taqiqlash haqidagi xalqaro kelishuvni buzgan-buzmaganini aniqlash hamda Rossiya prezidenti Vladimir Putin va uning “eng yaqin odamlari” moliyaviy ishlari haqida hisobot taqdim etishni taklif qilmoqda.
Aleksey Navalniy 2020-yil avgustdan beri Germaniyada edi. U Tomsk—Moskva samolyotida o‘zini yomon his qilgani sababli davolanish uchun olib ketilgan. Tahlillar natijasiga ko‘ra, Navalniy “Novichok” guruhidagi modda bilan zaharlangani ma’lum bo‘ldi. Dekabr oyida Bellingcat va The Insider siyosatchini Federal xavfsizlik xizmatining sakkiz nafar xodimidan iborat maxsus guruh zaharlagani ta’kidlangan tekshiruv natijalarini e’lon qildi.
Navalniy 17-yanvar kuni kechqurun Berlindan Moskvaga qaytib keldi. Sheremetyevo aeroportida siyosatchi “Iv Roshe” ishi doirasida hibsga olindi va Ximki shahridagi politsiya bo‘limiga olib ketildi. Ximki shahar sudi Aleksey Navalniyni 15-fevralga qadar qamoqqa olish bo‘yicha hukm chiqargan.
28-yanvar kuni Moskva viloyat sudi Aleksey Navalniyning advokatlari tomonidan siyosatchining Moskvadagi “Matrosskaya tishina” nomli tergov izolyatoridan ozod qilinishini talab qilgan apellyatsiya shikoyatini rad etgan. Uchrashuv davomida Navalniy tergov izolyatoridan videoaloqa orqali nutq so‘zlagan.
2-fevral kuni sud Navalniyga “Iv Roshe” ishi bo‘yicha berilgan shartli muddatni haqiqiysiga almashtirdi va 2 yil-u 8 oy koloniya tayinladi. G‘arb mamlakatlari siyosatchini ozod etishni talab qildi. Moskva va Peterburgda uni qo‘llab-quvvatlab aksiyalar o‘tkazildi. Moskvaning o‘zida namoyishchilarga qarshi 8 mingdan ortiq politsiyachilar va gvardiyachilar jalb qilindi. Ular bir yarim ming kishini hibsga oldi.
Mavzuga doir:
Izoh (0)