Germaniyaning BioNTech kompaniyasi bilan hamkorlikda koronavirusga qarshi vaksina ishlab chiqqan Amerikaning Pfizer kompaniyasi 2021-yilda ushbu dori sotuvidan 15 milliard dollar foyda olishi kutilmoqda. Yil oxiriga qadar kompaniya jami 59,4-61,4 milliard dollar daromad ko‘rishni prognoz qilyapti. Bu haqda Bloomberg ma’lumotlariga tayanib, “RBK” xabar berdi.
Pfizer va BioNTech vaksinasi AQSh va Yevropa Ittifoqi mamlakatlarida tasdiqlangan birinchi vaksina bo‘ldi. Biroq Johnson & Johnson va Novavax kompaniyalarining vaksinalari yaqinda Pfizer’ning raqobatchilariga aylanishi mumkin. Bundan tashqari, COVID-19’ning yangi shtammlari qo‘shimcha dori vositalari ishlab chiqishni talab qilishi mumkin.
Pfizer COVID-19 vaksinasining bir dozasi uchun ancha yuqori — 19,5 dollar narx belgilagan. Britaniyaning AstraZeneca kompaniyasi, vaksinasining narxi bir doza uchun 4 dollardan kam bo‘lishini aytgandi. AQSh mazkur vaksinadan foydalanish uchun hali ruxsat bermagan. Johnson & Johnson o‘z vaksinasi narxini 10 dollardan kam qilib belgilashni rejalashtirmoqda.
“2021-yilgi prognozga, birinchi navbatda, amaldagi shartnomalar bo‘yicha joriy yilda yetkazib berilishi kutilayotgan dozalar kiradi”, — deyiladi kompaniya xabarida.
Vaksinani hisobga olmaganda, Pfizer 2021-yilda 44,4-46,4 milliard dollar atrofida foyda olishni kutmoqda. Kompaniyaning har bir aksiyasidan keladigan foyda 3,10 dan 3,20 dollargacha bo‘lishi bashorat qilinmoqda.
Dastlab Pfizer va BioNTech 2021-yilda 1,3 milliard doza vaksina ishlab chiqarishni rejalashtirgandi. Endi ular doza miqdorini 2 milliardgacha chiqarmoqchi.
Bloomberg Vaccine Tracker ma’lumotlariga ko‘ra, bugungi kunda Pfizer va BioNTech 836 million doza vaksina yetkazib berish bo‘yicha kelishuvlar imzolagan, jumladan, Yevropa Ittifoqi uchun 300 million va AQSh uchun 200 million dozada vaksina yetkazib beradi.
Hozirga qadar AQSh va Yevropa Ittifoqi regulyatorlari Pfizer va Moderna vaksinalarini qo‘llashni ma’qullagan. Mamlakatlarda ushbu vaksinalar bilan emlash allaqachon boshlangan.
Xabarga ko‘ra, Qo‘shma Shtatlarda koronavirusga qarshi tasdiqlangan ikkita vaksinaning hech bo‘lmaganda bittasini olganlar soni butun pandemiya davomida mamlakatda COVID-19’ga chalinganlar sonidan oshib ketdi. Ayni paytda mamlakatda 26,5 million kishi emlangan. Jons Hopkins universiteti ma’lumotlariga ko‘ra, epidemiya boshlanganidan beri Qo‘shma Shtatlarda 26,3 million kishida koronavirus infeksiyasi aniqlangan.
Eslatib o‘tamiz, Norvegiyada Pfizer/BioNTech koronavirusga qarshi vaksinasini qabul qilgan 23 kishi vafot etgan.
Avvalroq ekspertlar Pfizer vaksinasi qo‘llanganidan keyin kelib chiqayotgan o‘limlarga izoh bergandi. Ularning fikricha, emlanganda keyingi ikkilamchi ta’sirlar va asoratlar vaksina turi yoki uning aholining kasallikka moyil guruhlarida qo‘llanilishi bilan bog‘liq bo‘lishi mumkin.
Izoh (0)