Америкалик сенаторлар гуруҳи АҚШ Конгрессига мухолифатчи Алексей Навальний билан боғлиқ вазият туфайли Россияга қарши санкциялар тўғрисидаги қонун лойиҳасини киритди. Тегишли баёнот республикачи сенатор Марк Рубионинг сайтида эълон қилинди, деб ёзади «РБК». Ташаббусга унинг бир қатор ҳамкасблари ҳаммуаллифлик қилди.
«Сенаторлар халқаро ҳуқуқнинг бузилишига, шу жумладан, мухолифат етакчиси ва коррупцияга қарши кураш бўйича фаол Алексей Навальнийнинг заҳарланишига ва қамаб қўйилишига алоқадор бўлган россиялик мансабдорларга қарши мақсадли санкциялар жорий қилишни кўзда тутадиган қонун лойиҳасини қайтадан киритди», — дейилади хабарда.
Бунда гап сенаторлар Россия ҳукуматига қарши киритишни 2020 йил сентябрида таклиф қилган санкциялар лойиҳаси ҳақида бормоқда. Ҳужжатда чекловлар таъсирига тушиши мумкин бўлган шахсларнинг исмлари ва лавозимлари келтирилмаган. Қонун лойиҳасида эҳтимолий санкциялар сифатида активларнинг музлатилиши ва виза бермаслик тилга олинган.
Ҳужжат, шунингдек, АҚШ маъмуриятига Россия ҳукумати кимёвий ва биологик қуролдан фойдаланишни тақиқлаш ҳақидаги халқаро келишувни бузган-бузмаганини аниқлаш ҳамда Россия президенти Владимир Путин ва унинг «энг яқин одамлари» молиявий ишлари ҳақида ҳисобот тақдим этишни таклиф қилмоқда.
Алексей Навальний 2020 йил августдан бери Германияда эди. У Томск—Москва самолётида ўзини ёмон ҳис қилгани сабабли даволаниш учун олиб кетилган. Таҳлиллар натижасига кўра, Навальний «Новичок» гуруҳидаги модда билан заҳарлангани маълум бўлди. Декабрь ойида Bellingcat ва The Insider сиёсатчини Федерал хавфсизлик хизматининг саккиз нафар ходимидан иборат махсус гуруҳ заҳарлагани таъкидланган текширув натижаларини эълон қилди.
Навальний 17 январь куни кечқурун Берлиндан Москвага қайтиб келди. Шереметьево аэропортида сиёсатчи «Ив Роше» иши доирасида ҳибсга олинди ва Химки шаҳридаги полиция бўлимига олиб кетилди. Химки шаҳар суди Алексей Навальнийни 15 февралга қадар қамоққа олиш бўйича ҳукм чиқарган.
28 январь куни Москва вилоят суди Алексей Навальнийнинг адвокатлари томонидан сиёсатчининг Москвадаги «Матросская тишина» номли тергов изоляторидан озод қилинишини талаб қилган апелляция шикоятини рад этган. Учрашув давомида Навальний тергов изоляторидан видеоалоқа орқали нутқ сўзлаган.
2 февраль куни суд Навальнийга «Ив Роше» иши бўйича берилган шартли муддатни ҳақиқийсига алмаштирди ва 2 йил-у 8 ой колония тайинлади. Ғарб мамлакатлари сиёсатчини озод этишни талаб қилди. Москва ва Петербургда уни қўллаб-қувватлаб акциялар ўтказилди. Москванинг ўзида намойишчиларга қарши 8 мингдан ортиқ полициячилар ва гвардиячилар жалб қилинди. Улар бир ярим минг кишини ҳибсга олди.
Мавзуга доир:
Изоҳ (0)