Olimlar samolyotda uzoq vaqt parvoz qilish COVID-19 yuqtirib olish ehtimolini keskin oshirishi mumkinligidan ogohlantirdi

Buyuk Britaniyaning Grinvich universiteti olimlari COVID-19’ning samolyot bortida yuqish ehtimoli qay darajada ekanligini aniqlash maqsadida tadqiqotlar o‘tkazdi. Bu haqda “Izvestiya” xabar berdi.

Olimlarning aniqlashicha, vaziyat eng yomon ssenariy bo‘yicha ketgan vaqtda, ya’ni samolyot bortida koronavirusga chalingan odam bor bo‘lgan holatda 12 soat davom etadigan parvozning o‘zida ekonom klassda uchayotgan 99,6 foiz yo‘lovchi va biznes klassdagilarning yarmi infeksiyani yuqtirib olishi mumkin.

Britaniyalik olimlar ishlab chiqqan matematik modelda biznes va ekonom klassdagi qurilmalarning farqi, samolyot havo aylanish tizimi, yo‘lovchilar uchun ventilyatsiya tizimining darajasi, bir nafar kasallangan yo‘lovchi nafas olib nafas chiqargan vaqtida bortda harakatlana boshlaydigan koronaviruslarning soni va boshqa jihatlar hisobga olingan.

Ikki soat davomida uchuvchi yo‘lovchilar uchun ekonom klassda kasallanishning eng maksimal darajadagi ehtimoli 60,2 foizni tashkil qiladi. Bu salonda jami 75 nafar yo‘lovchi parvoz qilayotgan bo‘lsa, ularning kamida 45 nafari kasallanishi mumkinligini anglatadi. Biznes klassda ketayotganlarning koronavirusga chalinish ehtimoli 10,9 foizga teng, ya’ni 50 nafar yo‘lovchidan 5 yoki 6 nafari koronavirus yuqtirib olishi mumkin.

Samolyotdagi parvoz olti soatdan uzoq davom etadigan bo‘lsa, koronavirus infeksiyasini yuqtirib olish ehtimoli yanada o‘sib boradi.

2020-yil oktabr oyida Xalqaro havo transporti assotsiatsiyasining ekspertlari aviaparvozlar vaqtida koronavirusga chalinish xavfi nihoyatda past ekanini ma’lum qilgandi.