Xitoy rivojlanayotgan davlatlar uchun COVID-19’ga qarshi 10 million doza vaksina taqdim qiladi
Xitoy Jahon sog‘liqni saqlash tashkilotining COVAX xalqaro mexanizmiga 10 million dozadagi COVID-19 koronavirus infeksiyasiga qarshi vaksina taqdim qiladi. Bu haqda Xitoy TIVning rasmiy vakili Van Venbin ma’lum qilgan.
“Yetarli imkoniyatlarga ega davlatlar COVAX loyihasini amalga oshirishda ko‘mak berishiga, JSST tomonidan amalga oshirilayotgan ishlarni qo‘llab-quvvatlashiga, jahon hamjamiyatiga pandemiya bilan kurashda rivojlanayotgan mamlakatlar uchun yordam ko‘rsatishiga umid qilmoqdamiz”, — deya Venbin so‘zlarini keltirgan ABC News.
Qayd etilishicha, Xitoy hukumati tomonidan rivojlanayotgan mamlakatlarga katta hajmdagi mahalliy vaksinalar partiyasi yuborilgan. JSST tomonidan Xitoy vaksinalarini favqulodda vaziyatlarda qo‘llash bo‘yicha ko‘rib chiqish jarayoni boshlangan.
COVAX — JSST doirasidagi xalqaro mexanizm. Loyihaga ko‘ra koronavirus pandemiyasiga qarshi kurash uchun 190 ta mamlakat va iqtisodiyotlarga ko‘mak ko‘rsatiladi.
BMTning inson huquqlari va xalqaro birdamlik masalalari bo‘yicha mustaqil eksperti Obiora Okafor 22-yanvarda aholisini COVID-19’ga qarshi vaksinalar bilan ta’minlagan, yuqori daromadli davlatlar COVAX doirasida boshqalarga ko‘mak berishga e’tibor qaratishi lozimligini bildirgandi.
Jahon sog‘liqni saqlash tashkiloti rahbari Tedros Adan Gebreyesus 17-yanvarda turli mamlakatlarda yashovchi aholini koronavirus infeksiyasiga qarshi emlash muammosining yechimini topish tobora murakkablashib borayotganini qayd etgan.
Mavzuga doir:
