Milliy atmosfera tadqiqotlari markazi (NCAR, AQSh) mutaxassislari COVID-19 pandemiyasi sababli ijtimoiy faollikning pasayishi va lokdaunlar 2020-yilda Yer yuzining isishiga olib kelganini aniqladi, deya xabar bermoqda “Interfaks”.
“Atrof-muhitni ifloslantiruvchi sanoat korxonalari chiqindilarining miqdori sezilarli darajada kamaygan va bu haroratga ta’sir ko‘rsatmoqda”, – deydi tadqiqotning yetakchi muallifi, NCAR olimi Endryu Gettelman.
Mutaxassislarning fikriga ko‘ra, bunga Yer atmosferasiga kiruvchi quyosh nurlarini to‘sib qo‘yadigan aerozol chiqindilarining kamayishi sabab bo‘lgan. 2020-yil bahorida AQSh va Rossiya kabi sanoati rivojlangan mamlakatlarda aerozol chiqindilarini chiqarish kamaygan va quyosh issiqligining katta qismi sayyoramizga yetib kelgan.
O‘tgan bahorda Yer yuzidagi harorat kutilganidan Selsiy bo‘yicha 0,1-0,3 darajagacha yuqori bo‘lgan.
“Bu effekt odatda aerozollarning katta miqdordagi chiqindilari bilan bog‘liq bo‘lgan mintaqalarda aniq namoyon bo‘ldi, masalan, AQSh va Rossiyaning aksariyat qismida harorat oshishi Selsiy bo‘yicha 0,37 darajaga yetgan”, – deyiladi nashrda.
Gettelmanning ta’kidlashicha, Yer yuzining qisqa muddatli bunday isishiga qaramay, pandemiya vaqtida chiqarilgan karbonat angidrid gazining atmosferadagi kam miqdori iqlim o‘zgarishini sekinlashtirishi mumkin.
Tadqiqotda NCAR olimlaridan tashqari Oksford universiteti, London Imperial kolleji va Lids universiteti (Buyuk Britaniya) mutaxassislari ishtirok etdi.
Avvalroq olimlar okeanlarda suv sathi kutilganidan ancha tez ko‘tarilayotganini ma’lum qilgani, O‘zbekistonda iqlim o‘zgarishlariga moslashish rejasi qabul qilinishi hamda Braziliyadagi ayrim tropik o‘rmonlar karbonat angidrid gazini yutish o‘rniga ajratishni boshlagani haqida xabar berilgandi.
Izoh (0)