O‘zbekistonda xorijda qiyin ahvolda qolgan mehnat migrantlariga xizmatlar ko‘rsatadigan jamg‘arma tashkil etiladi. Bu haqda Tashqi mehnat migratsiyasi agentligi matbuot xizmati xabar berdi.
“Xorijda murakkab moliyaviy ahvolga tushgan mehnat migrantlariga moddiy yordam berish tizimini kengaytirish maqsadida viloyatlar hokimliklari huzurida Prezidentning 2020-yil 15-sentabrdagi ‘Xavfsiz, tartibli va qonuniy mehnat migratsiyasi tizimini joriy qilish chora-tadbirlari to‘g‘risida’gi qarori asosida maxsus jamg‘arma tashkil etilmoqda”, — deyiladi xabarda.
Jamg‘arma mahalliy budjetning qo‘shimcha manbalari hamda qonun hujjatlari bilan taqiqlanmagan boshqa mablag‘lar hisobidan shakllantirib boriladi.
Jamg‘arma xorijda qiyin ahvolda qolgan mehnat migrantlariga quyidagi yo‘nalishlar bo‘yicha xizmatlar ko‘rsatadi:
- xorijiy ish beruvchilarda mavjud bo‘lgan bo‘sh ish o‘rinlarini taklif qilish;
- vatanga qaytarish uchun avia yoki temiryo‘l chiptalari haqini to‘lash;
- vafot etgan shaxs jasadini urf-odatlarga ko‘ra tayyorlashda 1000 AQSh dollarigacha xizmatlar haqini va O‘zbekistonga olib kelish uchun chipta haqini to‘lash.
Eslatib o‘tamiz, 2019-yilda O‘zbekiston bandlik va mehnat munosabatlari vaziri lavozimida ishlagan Sherzod Kudbiyev “Gruz—200” bo‘yicha barcha xarajatlar O‘zbekiston tomonidan to‘lanishini ma’lum qilgandi.
Izoh (0)