Toshkentda noqonuniy bunyod etilayotgan ko‘p qavatli uy qurilishi to‘xtatildi

Toshkent shahar qurilish sohasidagi hududiy nazorat inspeksiyasi ijtimoiy tarmoqlarda tarqalgan poytaxtning Yakkasaroy tumani Abdullayev ko‘chasidagi 59-uy manzilida ko‘p qavatli turar joy binosining sifatsiz qurilayotgani haqidagi xabarlarni o‘rgandi. Bu haqda Qurilish vazirligi matbuot xizmati xabar berdi.

Toshkent shahar Qurilish bosh boshqarmasining 2020-yil 7-avgustdagi 20112100/1-sonli ruxsatnomasiga muvofiq Faxriddin Ergashevga Yakkasaroy tumani Imom at-Termiziy ko‘chasi 29−31-uy manzilida joylashgan mavjud yuridik hujjatga ega “ofis” binosini “yerto‘la qavatlarida avtoturargoh, pastki qavatida savdo va maishiy xizmat ko‘rsatish majmuasi bo‘lgan turar joy binosi”ga ixtisoslashtirib, rekonstruksiya qilish uchun ruxsat berilgan. Shuningdek, bugungi kunda Faxriddin Ergashev va Creative Arch Design Group o‘rtasida loyiha smeta ishlarini amalga oshirish uchun shartnoma qilinib, loyihalash ishlari olib borilgan.

Qisqa muddatli inspektorlik tekshiruvi natijalariga ko‘ra, Vazirlar Mahkamasining 2018-yil 18-maydagi 370-sonli va 2020-yil 28-maydagi 343-sonli qarorlari talablarini qo‘pol ravishda buzgan holda qurilish inspeksiyasini qurilish-montaj ishlarini boshlashda xabardor qilmasdan noqonuniy ravishda qurilish-montaj ishlarini boshlaganligi, qurilish obyektida mualliflik va texnik nazorati umuman olib borilmaganligi aniqlangan.

Shuningdek, inspeksiya inspektori tomonidan 2020-yil 11-dekabrda qurilish-montaj ishlarini to‘xtatib, belgilangan tartibda instrumental texnik ko‘rik o‘tkazish hamda tekshiruv xulosasini olib, belgilangan tartibda qurilish inspeksiyasini xabardor qilib, ro‘yxatdan o‘tish to‘g‘risidagi berilgan 2565-sonli yozma ko‘rsatmada qayd etilgan majburiyatlarni bajarmaganligi hamda Ma’muriy-javobgarlik to‘g‘risidagi kodeksining 99-moddasi (shaharsozlik to‘g‘risidagi qonun hujjatlarini buzish) 7-qismida ko‘rsatilgan qonunbuzarliklarni sodir etgan.

Yuqoridagilarga asoslangan holda qurilish ishlariga ma’sul shaxs Faxriddin Ergashevga nisbatan Ma’muriy javobgarlik to‘g‘risidagi kodeksning 99-modda 7-qismini qo‘llab, ko‘rib chiqishi yuzasidan 14-dekabr kuni Yakkasaroy tumani Ma’muriy sudiga to‘plangan hujjatlar yuborilgan. Bunga qo‘shimcha tarzda qurilish-montaj ishlari to‘xtatilgan.

Avvalroq Samarqand shahridagi aholi ko‘chib o‘tgan binoning 2 ta qavati buzib tashlanishi ma’lum bo‘lgandi.