Ўзбекистонда хорижда қийин аҳволда қолган меҳнат мигрантларига хизматлар кўрсатадиган жамғарма ташкил этилади. Бу ҳақда Ташқи меҳнат миграцияси агентлиги матбуот хизмати хабар берди.
«Хорижда мураккаб молиявий аҳволга тушган меҳнат мигрантларига моддий ёрдам бериш тизимини кенгайтириш мақсадида вилоятлар ҳокимликлари ҳузурида Президентнинг 2020 йил 15 сентябрдаги ‘Хавфсиз, тартибли ва қонуний меҳнат миграцияси тизимини жорий қилиш чора-тадбирлари тўғрисидаъги қарори асосида махсус жамғарма ташкил этилмоқда», — дейилади хабарда.
Жамғарма маҳаллий бюджетнинг қўшимча манбалари ҳамда қонун ҳужжатлари билан тақиқланмаган бошқа маблағлар ҳисобидан шакллантириб борилади.
Жамғарма хорижда қийин аҳволда қолган меҳнат мигрантларига қуйидаги йўналишлар бўйича хизматлар кўрсатади:
- хорижий иш берувчиларда мавжуд бўлган бўш иш ўринларини таклиф қилиш;
- ватанга қайтариш учун авиа ёки темир йўл чипталари ҳақини тўлаш;
- вафот этган шахс жасадини урф-одатларга кўра тайёрлашда 1000 АҚШ долларигача хизматлар ҳақини ва Ўзбекистонга олиб келиш учун чипта ҳақини тўлаш.
Эслатиб ўтамиз, 2019 йилда Ўзбекистон бандлик ва меҳнат муносабатлари вазири лавозимида ишлаган Шерзод Кудбиев «Груз—200» бўйича барча харажатлар Ўзбекистон томонидан тўланишини маълум қилганди.
Изоҳ (0)