Buxoro shahrida yashovchi 63 yoshli fuqaro I.F. Ichki ishlar organlari faoliyatini muvofiqlashtirish boshqarmasi navbatchilik qismiga ariza orqali murojaat qilib, mehmonxonasi shkafidan tilla taqinchoqlari o‘g‘irlab ketilganini bildirgan. Bu haqda “Daryo”ga xabar bergan viloyat IIB axborot xizmatining yozishicha, mazkur arizaga ko‘ra tezkor surishtiruv va tergov harakatlari olib borilgan.
Ma’lum bo‘lishicha, o‘g‘rilik 2021-yil 23-yanvar kuni kech soat 20:00 dan 22:00 ga qadar bo‘lgan vaqt oralig‘ida sodir bo‘lgan bo‘lib, noma’lum shaxs ayolning bahosi 5 million so‘mlik tilla taqinchoqlarini o‘g‘irlagan.
Olib borilgan surishtiruv harakatlari davomida holat yuzasidan Jinoyat kodeksining 169-moddasi 2-qismi (o‘g‘rilik) bilan jinoyat ishi qo‘zg‘atilgan va o‘g‘rilik Buxoro shahrida yashovchi 30 yoshli fuqaro U.H. ismli shaxs tomonidan sodir qilingani aniqlangan.
Qo‘lga olingan U.H. umumiy miqdori 5 million so‘mga teng ikki dona tilla uzukni egasiga qaytarib bergan.
Hozirda U.H.ga nisbatan qamoqqa olish tarzidagi ehtiyot chorasi qo‘llanilgan. Uning boshqa shu turdagi jinoyatlarga daxldorlik holatlari yuzasidan qo‘shimcha surishtiruv hamda dastlabki tergov harakatlari davom ettirilmoqda.
Izoh (0)