O‘zbekiston Bandlik va mehnat vazirligi “Murda uchun million” maqolasiga javob berdi
O‘zbekiston Respublikasi Bandlik va mehnat vazirligi Fergana.news’da e’lon qilingan “Murda uchun million” (“Million za gruz 200”) maqolasiga o‘z munosabatini bildirdi.
O‘zbekiston Respublikasi Bandlik va mehnat munosabatlari vazirligi “Buyuk Kelajak” ekspertlar kengashi a’zosi Bahrom Ismailovga mehnat muhojirlari huquqlari masalasi bilan shug‘ullanishni taklif etdi.
Eslatib o‘tamiz, B.Ismailov Rossiyadagi o‘zbekistonlik mehnat muhojirlariga yuridik yordam loyihasi to‘g‘risidagi Fergana.news saytiga intervyu bergan edi. U tashqi mehnat migratsiyasi agentligiga istalgan yurist tenderda qatnashib o‘zbekistonlik fuqarolarning manfaatlarini himoyalash imkonini qo‘lga kirita oladigan elektron maydon tashkil etishni taklif qilgan. Yurist ushbu tizimni tashkil etish bo‘yicha barcha xarajatlarni o‘z zimmasiga olishga tayyorligi, biroq vazirlikdan javob bo‘lmaganini bildirgan.
Vazirlik o‘z javobida mazkur loyihaning dastlabki ko‘rinishi tijorat hamda ma’lum guruhdagi odamlarga foyda keltirilishini nazarda tutgani tufayli mutaxassislar tomonidan ushbu jihatni bekor qilish hamda moliyalashtirishni to‘liq vazirlik hisobiga o‘tkazish masalasini ko‘targan.
Loyiha ijtimoiy-gumanitar ko‘rinishga o‘tishi bilan bog‘liq o‘zgarishlar munosabati bilan vazirlik mutaxassislari barcha xohlovchilarni mazkur masala muhokamasiga taklif etadi.
Bundan tashqari, vazirlik aziyat chekkan yoki halok bo‘lgan fuqarolar oilasiga ko‘rsatiladigan yuridik xizmatlarni ham yuz foiz moliyalashtirishga tayyorligini bildirgan.
Shuningdek, vazirlik O‘zbekiston tarixida birinchi marta so‘nggi yilning o‘zida:
— Rossiya va Koreya mehnat migrantlari bo‘yicha amaldagi choralar ko‘rilganini ma’lum qildi. Jumladan, xorijda mehnat qilayotgan fuqarolar huquqlari va manfaatlarini himoya qilish fondi tashkil etilgan;
— Moskva hamda Kvanju shaharlarida Tashqi mehnat migratsiyasi agentligi vakilligi ochilgan;
— Rossiya IIV xorijlik fuqarolarni vaqtinchalik saqlash markazidan 1314 nafar o‘zbekistonlik vataniga qaytarilgan va bu jarayon davom etmoqda;
— Rossiya, Koreya, Turkiya, Qozog‘iston va Yaponiyada halok bo‘lgan 94 nafar fuqaro jasadini olib kelish tashkillashtirilgan va moliyalashtirilgan;
— xorijiy ish beruvchilardan O‘zbekiston fuqarolari foydasiga 296 520 dollar to‘lanmagan maosh undirilgan;
— 12 744 nafar fuqaroga bepul yuridik maslahatlar hamda huquqiy ko‘mak ko‘rsatilgan.
Ayni paytda ham Moskva viloyati Serpuxov tumanida qullikka tushib qolgan 14 nafar fuqaroni O‘zbekistonga qaytarish bo‘yicha amaliy yordam ko‘rsatilayotgani bildirilgan.
