Jizzax viloyati hududidan o‘tgan M-39 magistral yo‘li bo‘yida noqonuniy ravishda tibbiy buyumlarni sotayotgan shaxs qo‘lga olindi, deya “Daryo”ga xabar bermoqda Bosh prokuratura.
Qayd etilishicha, Bosh prokuratura huzuridagi departamentning Do‘stlik tuman bo‘limi tomonidan Jizzax viloyati bojxona boshqarmasi bilan hamkorlikda tadbir o‘tkazilgan.
Tadbir davomida fuqaro D.R. tadbirkor sifatida davlat ro‘yxatidan o‘tmasdan, noqonuniy daromad orttirishni ko‘zlab, tibbiy buyumlarni dorixona va ularning filiallaridan tashqarisida muomalaga kiritgan U hech qanday hujjatlarsiz, umumiy qiymati 171,9 million so‘mlik 3 000 komplekt COVID-19 virusini aniqlovchi testlar, pulsoksimetr, maxsus tibbiyot kislorod niqobi va boshqa buyumlarni tuman hududidan o‘tuvchi M-39 magistral yo‘li bo‘yida sotayotgan vaqtida ushlangan.
Mazkur holat yuzasidan D.R.ga nisbatan Jinoyat kodeksining 186-3-moddasi 3-qismi (juda ko‘p miqdorda dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqanddagi sog‘liqni saqlash muassasalari tomonidan 7 milliard so‘m budjet mablag‘lari talon-toroj qilingani aniqlangani, Toshkent viloyatida 200 quti “Remdesivir” dorisini jami 170 millionga sotgan shaxs qo‘lga olingani hamda Toshkent viloyatida 171 million so‘mlik dori vositalarini noqonuniy muomalaga kiritmoqchi bo‘lgan shaxs ushlangani haqida xabar berilgandi.
Izoh (0)