Toshkent shahar IIBB Tibbiyot bo‘limi shaxsiy tarkibi koronavirusga qarshi vaksina sinovining 3-bosqichida ishtirok etmoqda, deb xabar bermoqda bosh boshqarma matbuot xizmati.
Dastlab yanglishib Toshkent shahar IIBBda vaksinatsiya jarayoni boshlangani aytildi, so‘ng bu haqdagi xabar o‘chirilib, bu ommaviy emlash emas, undan avvalgi tadqiqot ekanligi bildirildi.
Xitoyning Anhui Zhifei Loncom Biofharmaceutical kompaniyasi tomonidan ishlab chiqilgan ZF2001 rekombinant vaksinasining klinik sinovining III bosqichi Innovatsiya vazirligi huzuridagi Ilg‘or texnologiyalar markazi va Sog‘liqni saqlash vazirligi Virusologiya ITI tomonidan o‘tkazilmoqda.
Vaksina sinovlaridan birinchilardan bo‘lib Toshkent shahar IIBB boshlig‘ining birinchi o‘rinbosari polkovnik Muhiddin Jo‘rayev o‘tdi.
Eslatib o‘tamiz, O‘zbekistonda COVID-19’ga qarshi vaksina sinovida ishtirok etadiganlar soni qariyb ikki baravar oshirildi. Endi unda besh ming emas, to‘qqiz ming kishi ishtirok etadi.
Mazkur ZF2001 rekombinant vaksinasining sinovlari ikki-tomonlama noma’lum, platsebo nazorat usulida olib borilmoqda. Ushbu vaksina sinovi O‘zbekistonda 10-dekabr kuni boshlangan bo‘lib, u 14 oy davom etadi.
Sinovda ko‘ngilli bo‘lib qatnashish uchun rozilik xatiga imzo chekkan, amal qilish muddati o‘tmagan identifikatsion hujjat taqdim etgan, test protokoli talablarini tushungan va unga mos kelgan, shuningdek, avval COVID-19’ga chalinmagan 18 yoshdan katta, sog‘lom fuqarolar ishtirok etmoqda.
Vaksina sinovlaridan ishtirok etishni istaganlar quyidagi havola orqali ro‘yxatdan o‘tishi mumkin.
Izoh (0)