O‘zbekistonda yanvar oyida inflyatsiya 1 foizni tashkil etdi

O‘zbekistonda inflyatsiya darajasi yanvar oyida 1 foizni tashkil etdi. Bu haqda Davlat statistika qo‘mitasining hisobotida keltirilgan.

Spot’ning yozishicha, ushbu ko‘rsatkich Markaziy bank prognozlarini oqladi — 2021-yilda inflyatsiya 11-12,5 foiz atrofida bo‘lishini prognoz qilgan, buni iqtisodiyotda vujudga kelayotgan vaziyat va davom etayotgan pandemiya sharoitidagi noaniqlik bilan izohlagandi.

Yanvar oyida iste’mol tovarlari narxi 1,2 foizga, nooziq-ovqat mahsulotlari 0,5 foizga ko‘tarilgan, xizmatlar 1,4 foizga qimmatlagan.

Qayd etilishicha, oziq-ovqat mahsulotlari va spirtsiz ichimliklar asosiy guruhlari ichida mevalar va yong‘oqlar (3,2 foiz), sabzavotlar, ildizmevalilar, plantaynlar (sabzavot bananlar) va dukkaklilar (2,3 foiz) narxlari mavsumiy omil ta’sirida oy davomida sezilarli darajada oshdi.

2020- yilning yanvar oyi bilan taqqoslaganda, asosiy turdagi oziq-ovqat mahsulotlaridan grechixa doni (1,5 barobarga), tuxum, o‘simlik yog‘lari, qo‘y go‘shti (1,3 barobarga), shakar, mol go‘shti (1,2 barobarga), xom sut (18,4 foizga), un (14,9 foizga), barcha navdagi guruch va guruch oqshog‘i (14,1 foizga) sezilarli darajada qimmatlagan.

Xizmatlardan suv ta’minoti (1,6 barobar), maishiy chiqindi uchun to‘lov (0,7 foiz) oshgan.

Bundan tashqari, tibbiyot ham qimmatladi: yil davomida dori vositalari 13,8 foizga, davolanish 7,8 foizdan 15,2 foizgacha qimmatladi.