Тошкент шаҳар ИИББ Тиббиёт бўлими шахсий таркиби коронавирусга қарши вакцина синовининг 3-босқичида иштирок этмоқда, деб хабар бермоқда бош бошқарма матбуот хизмати.
Дастлаб янглишиб Тошкент шаҳар ИИББда вакцинация жараёни бошлангани айтилди, сўнг бу ҳақдаги хабар ўчирилиб, бу оммавий эмлаш эмас, ундан аввалги тадқиқот эканлиги билдирилди.
Хитойнинг Anhui Zhifei Loncom Biofharmaceutical компанияси томонидан ишлаб чиқилган ZF2001 рекомбинант вакцинасининг клиник синовининг III босқичи Инновация вазирлиги ҳузуридаги Илғор технологиялар маркази ва Соғлиқни сақлаш вазирлиги Вирусология ИТИ томонидан ўтказилмоқда.
Вакцина синовларидан биринчилардан бўлиб Тошкент шаҳар ИИББ бошлиғининг биринчи ўринбосари полковник Муҳиддин Жўраев ўтди.
Эслатиб ўтамиз, Ўзбекистонда COVID-19’га қарши вакцина синовида иштирок этадиганлар сони қарийб икки баравар оширилди. Энди унда беш минг эмас, тўққиз минг киши иштирок этади.
Мазкур ZF2001 рекомбинант вакцинасининг синовлари икки-томонлама номаълум, плацебо назорат усулида олиб борилмоқда. Ушбу вакцина синови Ўзбекистонда 10 декабрь куни бошланган бўлиб, у 14 ой давом этади.
Синовда кўнгилли бўлиб қатнашиш учун розилик хатига имзо чеккан, амал қилиш муддати ўтмаган идентификацион ҳужжат тақдим этган, тест протоколи талабларини тушунган ва унга мос келган, шунингдек, аввал COVID-19’га чалинмаган 18 ёшдан катта, соғлом фуқаролар иштирок этмоқда.
Вакцина синовларидан иштирок этишни истаганлар қуйидаги ҳавола орқали рўйхатдан ўтиши мумкин.
Изоҳ (0)